కొడుకు లేకపోయినా తండ్రి తివాచీ వృత్తిని కొనసాగిస్తున్న కూతురు

వరంగల్‌కు చెందిన సంధ్య తన తండ్రి నర్సింగరావు చేపట్టిన తివాచీల తయారీ వృత్తిని కొనసాగిస్తున్నారు. నర్సింగరావుకు ముగ్గురు కూతుళ్లే. కొడుకు లేకపోవడంతో తన చేతివృత్తి ఎవరికీ అందకుండా పోతుందని ఆయన బాధపడేవారు. కానీ పెద్ద కూతురు సంధ్య ఈ బాధ్యతను స్వీకరించారు.

నిలువు మగ్గాలపై పూర్తిగా చేతితో తివాచీలు నేసే ఏకైక స్థలం రాష్ట్రంలో ఇదేనని సంధ్య చెబుతున్నారు. మిషన్లు లేకుండా చేసే ఈ తివాచీలు ఎక్కువ కాలం మన్నికగా ఉంటాయని ఆమె తెలిపారు. పాత డిజైన్లతో పాటు కంప్యూటర్ డిజైన్లను కూడా వీరు వాడుతున్నారు.

ఈ చేతివృత్తికి మంచి స్పందన లభిస్తోంది. ఆన్‌లైన్ ఆర్డర్లు కూడా వస్తున్నాయని సంధ్య చెప్పారు. ఆమె ఇప్పటివరకు 50 మందికి శిక్షణ ఇవ్వగా, ప్రస్తుతం 10 మంది వారి ఇళ్లలోనే ఈ పని చేస్తున్నారు.

ఈ వృత్తికి గుర్తింపుగా సంధ్య రెండు రాష్ట్ర స్థాయి అవార్డులు అందుకున్నారు. ఇటీవల కొండా లక్ష్మణ్ బాపూజీ అవార్డు కూడా వచ్చింది.

తివాచీల షెడ్డు నిర్మాణానికి రుణం ఇప్పించాలని సంధ్య ప్రభుత్వ అధికారులను కోరుతున్నారు. తన తండ్రి చేతివృత్తి ఆగిపోకుండా ముందుకు తీసుకెళ్లాలనేదే తన లక్ష్యమని ఆమె పేర్కొన్నారు.