గుజరాత్‌లోని మోర్బీ జిల్లా వీర్పార్దా గ్రామంలో బావిలో అలలు: శాస్త్రవేత్తల వివరణ

గుజరాత్ లోని మోర్బీ జిల్లా వీర్పార్దా గ్రామంలో ఒక బావిలో నీళ్లు సముద్రపు అలల్లా ఎగిసిపడుతున్నాయి. రైతు ప్రాంజీవన్ భాయ్ తన పొలంలో తవ్వించిన 18 అడుగుల లోతైన బావి గత పది రోజులుగా కురిసిన భారీ వర్షాలతో నిండింది. ఆగస్టు 2వ తేదీన బావి ఒక్కసారిగా నిండి, లోపల నీళ్లు అల్లకల్లోలంగా ఉప్పొంగి అంచులు దాటి బయటకు రావడం ప్రారంభమైంది.

ఈ దృశ్యాన్ని చూసేందుకు చుట్టుపక్కల గ్రామాల ప్రజలు తండోపతండాలుగా వచ్చారు. కొందరు ఇది దేవుడి మహిమ అని, మరికొందరు భూకంప హెచ్చరిక అని భావించి భయాందోళనకు గురయ్యారు.

మోర్బీ జిల్లా కలెక్టర్ స్వప్నిక్ కరే వెంటనే స్పందించి, ఇన్స్టిట్యూట్ ఆఫ్ సిస్మాలజికల్ రీసెర్చ్ (ISR) బృందాన్ని రంగంలోకి దించారు. ISR నిపుణులు పరీక్షించి, భూమి పొరలలో ఎలాంటి కదలికలు లేవని, భూకంపం ప్రమాదం లేదని స్పష్టం చేశారు. భారీ వర్షాల వల్ల భూగర్భ జలాలు పెరిగి, రాళ్ల మధ్య ఉన్న గాలిని ఒత్తిడికి గురి చేయడంతో, ఆ గాలి బావి ద్వారా బయటకు వేగంగా వచ్చి నీటిని ఎగజిమ్మింది. దీనిని ‘వెల్ సీజ్ ఎఫెక్ట్’గా శాస్త్రవేత్తలు వర్ణించారు.

ప్రస్తుతం అధికారులు బావి చుట్టూ బారికేడ్లు ఏర్పాటు చేశారు. భూకంపం వస్తుందనే వదంతులు నమ్మవద్దని ప్రజలకు సూచించారు. గుజరాత్ గ్రౌండ్ వాటర్ రీసెర్చ్ టీం ఇంకా లోతైన అధ్యయనం చేస్తోంది.