తెలంగాణకు ఎల్లో, ఆరెంజ్ అలర్ట్‌లు; ఏపీలో మూడ్రోజులు తేలికపాటి వర్షాలు

తెలంగాణలో రాబోయే రోజుల్లో వర్షాలు కొనసాగే అవకాశం ఉన్న నేపథ్యంలో వాతావరణ శాఖ అధికారులు హెచ్చరికలు జారీ చేశారు. రాష్ట్రంలోని 11 జిల్లాలకు ఎల్లో అలర్ట్ జారీ చేయగా, నల్గొండ జిల్లాకు ఆరెంజ్ అలర్ట్ ప్రకటించారు. ఈ జిల్లాల్లో ఉరుములు, మెరుపులతో కూడిన వర్షాలు పడతాయని, గంటకు 40 కిలోమీటర్ల వేగంతో ఈదురుగాలులు వీచే అవకాశం ఉందని అధికారులు తెలిపారు.

భారీ వర్షాల కారణంగా లోతట్టు ప్రాంతాల్లో నీటి నిలవలు, రోడ్లపై వరద పరిస్థితులు ఏర్పడవచ్చని హెచ్చరించారు. ప్రజలు చెట్లు, విద్యుత్ స్తంభాలు, హోర్డింగ్ల వద్ద జాగ్రత్తగా ఉండాలని, అత్యవసరమైతే తప్ప బయటకు వెళ్లకూడదని సూచించారు.

మరోవైపు, ఉత్తర ఒడిశా పరిసర ప్రాంతాల్లో ఏర్పడిన అల్పపీడనం, దానికి అనుబంధంగా ఉపరితల ఆవర్తనం కొనసాగుతున్నాయి. ఈ వాతావరణ వ్యవస్థ ప్రభావంతో ఆంధ్రప్రదేశ్‌పై పశ్చిమ వాయువ్య దిశల నుంచి గాలులు వీస్తున్నాయి. రాబోయే మూడు రోజుల్లో రాష్ట్రంలోని పలు ప్రాంతాల్లో తేలికపాటి వర్షాలు, చిరుజల్లులు పడే అవకాశం ఉందని వాతావరణ శాఖ అంచనా వేసింది. ఆకాశం మేఘావృతమై ఉంటుందని, స్థానిక పరిస్థితుల ఆధారంగా వర్షం తీవ్రతలో మార్పులు ఉండవచ్చని అధికారులు తెలిపారు.

గత రెండు రోజులుగా ఉత్తరాంధ్ర జిల్లాల్లో భారీ వర్షాలు దంచి కొడుతున్నాయి. విశాఖపట్నం, విజయనగరం, అల్లూరి సీతారామరాజు, పార్వతీపురం మన్యం, శ్రీకాకుళం జిల్లాలతో పాటు తూర్పు గోదావరి (కాకినాడ, రాజమండ్రి), అనకాపల్లి జిల్లాల్లో వచ్చే మూడు రోజులు వర్షాలు కురిసే అవకాశం ఉంది. ఈదురుగాలులు, పిడుగులు పడే ప్రమాదం ఉన్నందున ప్రజలు, రైతులు అప్రమత్తంగా ఉండాలని, సురక్షిత ప్రాంతాలకు చేరుకోవాలని వాతావరణ శాఖ హెచ్చరించింది. మత్స్యకారులు సముద్రంలోకి వెళ్లకుండా జాగ్రత్తలు తీసుకోవాలని కూడా సూచించింది.