వెదజల్లిన వరిలో కలుపు నివారణ: ఘంటసాల కృషి విజ్ఞాన కేంద్రం సూచనలు

వరి సాగులో ఇటీవల రైతులు ఎక్కువగా విత్తనాలు నేరుగా వెదజల్లే పద్ధతిని అనుసరిస్తున్నారు. నాట్లు వేసే సంప్రదాయ పద్ధతితో పోలిస్తే ఈ విధానంలో కూలీల అవసరం తగ్గుతుంది. పెట్టుబడి ఖర్చులు కూడా ఆదా అవుతాయి. అయితే ఇందులో కలుపు సమస్య ఎక్కువగా ఉంటుంది. కలుపును సకాలంలో నియంత్రించకపోతే దిగుబడి 90% వరకు తగ్గిపోతుందని ఘంటసాల కృషి విజ్ఞాన కేంద్రం శాస్త్రవేత్త మహాలక్ష్మి తెలిపారు.

ఆమె సూచించిన నివారణ పద్ధతులు వివిధ దశల వారీగా ఉన్నాయి. ముందుగా విత్తడానికి 10-15 రోజుల ముందు, పారాక్వాట్ 5 మి.లీ. + 10 గ్రాముల యూరియా ఒక లీటర్ నీటిలో కలిపి పిచికారి చేయాలి. విత్తిన వెంటనే 1-2 రోజుల లోపు, పెండిమెథాలిన్ 1 లీటర్ లేదా ప్రెటిలాక్లోర్ 400 మి.లీ. ని 200 లీటర్ల నీటిలో కలిపి ఎకరానికి పిచికారి చేయాలి. 15-20 రోజుల దశలో గడ్డి, వెడల్పాటి కలుపు మొక్కలు ఉంటే బిస్పైరిబాక్ సోడియం 100 మి.లీ. లేదా ట్రైమెఫోన్ ప్లస్ ఇథాక్సీ సల్ఫ్యూరాన్ 90 గ్రాములు 200 లీటర్ల నీటితో కలిపి పిచికారి చేయాలి. కేవలం గడ్డి జాతి కలుపులు ఉంటే సైహలోఫాప్ పి బ్యూటిల్ 400 మి.లీ. 200 లీటర్ల నీటితో వాడాలి. 25-30 రోజుల దశలో వెడల్పాటి కలుపులు మాత్రమే ఉంటే 2,4-D సోడియం సాల్ట్ 400 గ్రాములు ఎకరానికి ఇవ్వాలి.

దమ్ము చేసిన పొలంలో నేరుగా విత్తే వారికి ప్రత్యేక సూచనలు ఉన్నాయి. విత్తిన 3-5 రోజుల లోపు పైరజోసల్ఫ్యూరాన్ ఇథైల్ 100 గ్రాములు లేదా ప్రెటిలాక్లోర్ 400 మి.లీ. ని అర లీటరు నీటితో కలిపి 25 కిలోల పొడి ఇసుకలో మిక్స్ చేసి వెదజల్లాలి. ఈ పద్ధతులతో కలుపు సమర్థంగా నివారించవచ్చని శాస్త్రవేత్త తెలిపారు.