అనకాపల్లి జిల్లాలో భర్త హత్య: భార్య, ప్రియుడు అరెస్ట్

అనకాపల్లి జిల్లా దేవరాపల్లి మండలం శ్రీరామపురంలో ఈ నెల 1న ద్వారపు రెడ్డి అప్పల్ నాయుడు హత్యకు గురయ్యారు. మృతుడి సోదరుడు ఇచ్చిన ఫిర్యాదు మేరకు పోలీసులు అనుమానాస్పద మృతి కేసు నమోదు చేసి దర్యాప్తు ప్రారంభించారు.

పోలీసుల కథనం ప్రకారం, అప్పల్ నాయుడు భార్య హైమాకు దేవరాపల్లిలో రెస్టారెంట్ నిర్వహించే గంగాధర్ అనే వ్యక్తితో నాలుగేళ్లుగా వివాహేతర సంబంధం కొనసాగింది. ఈ విషయాన్ని భర్త గమనించి విశాఖలోని కళాశాల ఉద్యోగం వదిలి స్వగ్రామం తిరిగి రావడంతో, అక్రమ సంబంధానికి అడ్డుగా నిలిచాడని భావించిన హైమా లక్ష రూపాయల సుపారి ఇచ్చి భర్తను చంపించినట్టు దర్యాప్తులో తేలింది. నిద్రిస్తున్న అప్పల్ నాయుడిని ఊపిరాడకుండా పీక నులిమి హత్య చేసినట్టు పోలీసులు తెలిపారు.

కేసుపై హైమా, గంగాధర్, గంగాధర్ మేనల్లుడు నాగభూషణ్ లను అరెస్ట్ చేశారు. ఇంకా ఇద్దరు నిందితులు పరారీలో ఉన్నారు. మొత్తం ఐదుగురు నిందితుల్లో హత్యకు సుపారి ఇవ్వడం, నిందితులను సమీకరించడంలో హైమాదే ప్రధాన పాత్ర అని పోలీసులు పేర్కొన్నారు.