ప్రపంచ ఫోటోగ్రఫీ దినోత్సవం: ఫోటోగ్రాఫర్లకు సీఎం చంద్రబాబు శుభాకాంక్షలు

ప్రపంచ ఫోటోగ్రఫీ దినోత్సవం సందర్భంగా ఆంధ్రప్రదేశ్ ముఖ్యమంత్రి చంద్రబాబు నాయుడు అసెంబ్లీ లాబీలో ఫోటోగ్రాఫర్లను కలిశారు. ఈ సందర్భంగా ఫోటోగ్రాఫర్లకు శుభాకాంక్షలు తెలిపారు.

చంద్రబాబు స్వయంగా కెమెరా తీసుకుని ఫోటోగ్రాఫర్లను వివిధ కోణాల్లో ఫోటోలు తీశారు. కెమెరా వెనుక పనిచేసే వారిని కెమెరాతోనే అభినందించారు.

చరిత్రను నమోదు చేయడంలో, జ్ఞాపకాలను పదిలపరచడంలో ఫోటోగ్రాఫర్ల పాత్ర కీలకమని సీఎం అన్నారు. ప్రతి ఫోటో కాలంలోని ఒక క్షణాన్ని శాశ్వతంగా భద్రపరుస్తుందని, భవిష్యత్ తరాలకు చరిత్రగా నిలుస్తుందని ఆయన చెప్పారు.

మీడియా వృత్తిపరమైన ఫోటోగ్రాఫర్లను కలవడం ఆనందంగా, గౌరవంగా ఉందని చంద్రబాబు తెలిపారు. ఫోటోగ్రాఫర్ల అంకితభావం, కళాత్మక ప్రతిభ, శ్రమ ఎన్నో చెప్పని కథలకు స్వరం ఇస్తున్నాయని ఆయన అన్నారు. అలాంటి క్షణాలను కెమెరాలో బంధిస్తూ ముందుకు సాగాలని ఆకాంక్షించారు.