మన్యం జిల్లాలో ఏనుగుల సంచరం.. నియంత్రణకు కుంకీ ఏనుగులు

పార్వతీపురం మన్యం జిల్లాలోని బలిజిపేట మండలం చింతాడ గ్రామంలో అడవి ఏనుగుల గుంపు కనిపించింది. దీంతో గ్రామస్తులు భయాందోళనకు గురైయ్యారు.

అటవీ శాఖ అధికారులు వెంటనే స్పందించారు. ఏనుగులను సురక్షితంగా అటవీ ప్రాంతంలోకి పంపేందుకు చర్యలు చేపట్టారు. అటవీ విస్తీర్ణం తగ్గడం, ఆహారం కొరత కారణంగా పొరుగు రాష్ట్రం ఒడిస్సా నుంచి ఏనుగులు తరచూ సరిహద్దు దాటి వస్తున్నాయని అధికారులు తెలిపారు. ఈ ఏనుగుల వల్ల వరి, మొక్కజొన్న, పామాయిల్, జీడి తదితర పంటలు దెబ్బతింటున్నాయి.

ఏనుగుల బెడద నివారణకు జిల్లాలోని గుచ్చిమి ఏనుగుల శిబిరం నుంచి జయంత, అభిమన్యు అనే రెండు శిక్షణ పొందిన కుంకీ ఏనుగులను చింతాడకు తరలిస్తున్నారు. వీటి సహాయంతో సంచరిస్తున్న ఏనుగులను అడవిలోకి తిరిగి పంపే ప్రయత్నం జరుగుతోంది.

గ్రామస్తులు రాత్రిపూట బయటకు రావడానికి భయపడుతున్నారు. పొలాలకు వెళ్లడం కష్టంగా మారిందని రైతులు ఆందోళన వ్యక్తం చేస్తున్నారు.