హైదరాబాద్ బాలాపూర్‌లో 4 రోజుల పసికందు అమ్మకానికి యత్నించిన మహిళ అరెస్టు

హైదరాబాద్ బాలాపూర్ ప్రాంతంలో 4 రోజుల పాపను అక్రమంగా విక్రయించేందుకు ప్రయత్నిస్తున్న వాహిదా అనే మహిళను పోలీసులు అరెస్టు చేశారు.

బాలాపూర్ పోలీస్ స్టేషన్ పరిధిలోని జేజే ఫంక్షన్ హాల్ సమీపంలో ఈ ఘటన వెలుగులోకి వచ్చింది. పసికందును అమ్మే ప్రయత్నం గురించి సమాచారం అందడంతో పోలీసులు అక్కడికి చేరుకుని వాహిదాను అదుపులోకి తీసుకున్నారు.

పోలీసుల విచారణలో ఆమె కీలక విషయాలు ఒప్పుకుంది. గత రెండు నెలలుగా తాను శిశువుల విక్రయాలు చేస్తున్నట్టు తెలిపింది. మగ శిశువును 7 లక్షలకు, ఆడ శిశువును 5 లక్షలకు విక్రయించినట్టు అంగీకరించింది.

వాహిదా ఒంటరిగానే ఈ తరహా విక్రయాలు చేస్తుందా లేక ఆమెకు ఎవరైనా సహకరిస్తున్నారా అనే కోణంలో పోలీసులు విచారణ కొనసాగిస్తున్నారు. ఆమె గతంలో ఎంతమంది పిల్లలను విక్రయించిందనే దానిపై కూడా దర్యాప్తు చేస్తున్నారు. పసికందు తల్లిదండ్రుల ఆచూకీ కనుగొనే ప్రయత్నం చేస్తున్నారు.