మచిలీపట్నం ఎస్పీపై మహిళా హోమ్‌గార్డ్ ఫిర్యాదు

కృష్ణా జిల్లా మచిలీపట్నం ఎస్పీపై ఓ మహిళా హోమ్‌గార్డ్ తీవ్ర ఆరోపణలు చేసింది. పెనమలూరు పోలీస్‌స్టేషన్‌లో విధులు నిర్వర్తిస్తున్న రూప్‌కల అనే హోమ్‌గార్డ్, తనపై ఉన్నతాధికారులు వేధింపులకు పాల్పడుతున్నారంటూ ఫిర్యాదు చేసింది.

రూప్‌కల తెలిపిన వివరాల ప్రకారం, ఆమెను ఒక అధికారి ఇంట్లో పనిచేయాలని ఒత్తిడి చేశారు. నిరాకరించడంతో హోమ్‌గార్డ్ కార్యాలయంలో శిక్షణ పేరుతో పని చేయించారు. అనారోగ్యం, కుటుంబ పరిస్థితులను చెప్పినా పట్టించుకోలేదని, ఎస్పీ దృష్టికి తీసుకెళ్లినా దురుసుగా ప్రవర్తించి అవమానించారని ఆరోపించింది.

ఈ క్రమంలో జిల్లా పోలీస్ కార్యాలయం విడుదల చేసిన ఓ ప్రెస్‌నోట్‌లో రూప్‌కల విధులకు సక్రమంగా హాజరు కాలేదని, శిక్షణకు రాలేదని పేర్కొని సస్పెండ్ చేసినట్లు తెలిపారు. అయితే ఈ ఆరోపణలను రూప్‌కల ఖండించింది. తన దగ్గర హాజరు ఆధారాలు ఉన్నాయని, తనపై తప్పుడు ఆరోపణలు చేశారని ఆమె చెప్పింది.

తన బాధను వినే నాథుడు లేడని, ఇక హోం మంత్రిని కలిసి న్యాయం కోరతానని రూప్‌కల తెలిపింది. ఈ విషయంపై పోలీస్ ఉన్నతాధికారులు ఎలా స్పందిస్తారనేది చూడాలి.