అనంతపురం: అత్త చనిపోవాలని కోరుతూ కోడలు కరెన్సీ నోటు హుండీలో

అనంతపురం జిల్లా ఆత్మకూరు మండలం పంపనూరులోని సుబ్రహ్మణ్యేశ్వర స్వామి ఆలయంలో ఓ మహిళ తన అత్త చనిపోవాలని కోరుతూ కరెన్సీ నోటుపై రాసి హుండీలో వేసింది. హుండీ లెక్కింపు సందర్భంగా అధికారులకు ఈ నోట్లు కనిపించాయి.

20 రూపాయల నోటుపై 'స్వామి, మా అత్త వేధింపులు తట్టుకోలేకపోతున్నాను. తొందరగా ఆమె చనిపోయేలా చూడు' అని, మరో నోటుపై 'స్వామి, మా అత్త త్వరగా చనిపోవాలి' అని రాసి ఉంది. ఈ ఘటన స్థానికంగా చర్చకు దారితీసింది.

కుటుంబంలో అత్త పెట్టే వేధింపులు ఏ స్థాయికి చేరితే ఇలాంటి అసాధారణ చర్య తీసుకుంటుందో అని స్థానికులు చర్చిస్తున్నారు. తన బాధను ఎవరికీ చెప్పుకోలేక మానసిక ఒత్తిడితో ఆ మహిళ ఈ పని చేసి ఉంటుందని అభిప్రాయపడుతున్నారు.

ఆలయాల్లో హుండీలు కేవలం కానుకలకే కాకుండా ఫిర్యాదులు, ఆవేదనలు తెలియజేసే వేదికగా మారుతున్నాయి. రెండు నెలల క్రితం జగిత్యాల జిల్లా కొండగట్టు ఆంజనేయ స్వామి ఆలయంలో సౌకర్యాలు లేవని ఓ భక్తుడు రాసిన లేఖ హుండీలో లభించింది. గత ఏడాది అనంతపురం జిల్లాలో మరో ఆలయంలో దొంగతనం చేసిన వ్యక్తులు నెల రోజుల తర్వాత డబ్బును తిరిగి హుండీలో వేసి క్షమాపణ లేఖ అందజేశారు.