ఆషాడ మాసం ముందు మెహందీ పండగ: తెలంగాణ మహిళల సంప్రదాయ గోరింటాకు వేడుకలు

తెలంగాణలోని పలు ప్రాంతాల్లో మహిళలు ఆషాడ మాసం సందర్భంగా మెహందీ (గోరింటాకు) పండగ ఘనంగా నిర్వహించారు. నాగర్కర్నూల్ జిల్లా అచ్చంపేటలో మహిళలు స్థానిక అమ్మవారికి సారె సమర్పించి, చేతులకు ఆకర్షణీయమైన గోరింటాకు డిజైన్లు వేసుకున్నారు.

పెద్దపల్లి జిల్లా సుల్తానాబాదులో కన్యక పరమేశ్వరి అమ్మవారి ఆలయంలో మహిళలు గోరింటాకు సమర్పించారు. ఆ తర్వాత దేవతకు మైలపు అలంకరణ చేసి, స్వయంగా తమ చేతులకు గోరింటాకు పూసుకున్నారు. ఈ ఉత్సవాన్ని సంప్రదాయబద్ధంగా జరుపుకున్నారు.

గోరింటాకు పార్వతి దేవి అంశ నుంచి ఆవిర్భవించిందని ప్రజల నమ్మకం. ఆషాడ మాసంలో గోరింటాకు పెట్టుకుంటే శరీర ఉష్ణోగ్రత తగ్గుతుందని, వర్షాకాలంలో తడిసినా జలుబు, జ్వరం వంటి రోగాల నుండి రక్షణ లభిస్తుందని విశ్వసిస్తారు. అలాగే, వివాహ సమయంలో వధువుకు గోరింటాకు పెట్టే ఆచారం దంపతుల మధ్య ప్రేమ, అనురాగాలకు సంకేతంగా భావిస్తారు.

గ్రామీణ ప్రాంతాల్లో మహిళలు తాజా గోరింటాకు ఆకును రోట్లో నూరి పేస్ట్ తయారు చేసుకుంటారు. పట్టణాల్లో మెహందీ కోన్స్ దుకాణాల్లో లభ్యమవుతాయి. కొందరు మహిళలు తమ బంధువలకు గోరింటాకు పంపించి, సంప్రదాయాన్ని కొనసాగిస్తున్నారు.