పార్కుల్లోనే పని చేసుకోవచ్చు.. హైదరాబాద్‌లో వర్క్ ఫ్రమ్ పార్క్ పైలట్ ప్రాజెక్ట్

హైదరాబాద్‌లో ఐటీ ఉద్యోగులు, వర్క్ ఫ్రమ్ హోమ్ చేసేవారు, ఫ్రీలాన్సర్లు, విద్యార్థులు పార్కుల్లోనే కూర్చుని పని చేసుకునేలా 'వర్క్ ఫ్రమ్ పార్క్' ప్రాజెక్టును మున్సిపల్ కార్పొరేషన్ ప్రతిపాదిస్తోంది. 2027 జనవరి నాటికి దీన్ని అమలులోకి తీసుకురావాలని లక్ష్యంగా పెట్టుకుంది.

పైలట్ ప్రాజెక్టులో భాగంగా రెండు పార్కులను గుర్తించారు. శేర్లింగంపల్లి జోన్ పరిధిలోని మసీద్ బండాలో మాధవ హిల్స్ కాలనీ పార్క్ ఉంది. ఈ పార్క్ 1.5 ఎకరాల విస్తీర్ణంలో ఉంది. అందులో 700 చదరపు గజాలను వర్క్ స్పేస్ కోసం కేటాయిస్తున్నారు. రెండో పార్క్ మాధాపూర్‌లో ఉంది.

ఇక్కడ మొదటి దశలో వర్క్ టేబుల్స్, సౌకర్యవంతమైన సీటింగ్, హై స్పీడ్ వైఫై కనెక్టివిటీ ఏర్పాటు చేయనున్నారు. ల్యాప్‌టాప్, మొబైల్ ఛార్జింగ్ పాయింట్లు, సీసీ కెమెరాలు కూడా ఉంటాయి. మధ్యలో విరామం తీసుకోవడానికి వాకింగ్ ట్రాక్ ఉంటుంది. కాఫీ, స్నాక్స్ కోసం ప్రత్యేక కియోస్క్‌లు ఏర్పాటు చేయాలని ప్రతిపాదన ఉంది.

ఈ సౌకర్యం పూర్తిగా ఉచితం కాదు. వైఫై, విద్యుత్, నిర్వహణ, శుభ్రత ఖర్చుల కోసం నామమాత్రపు యూజర్ ఫీ వసూలు చేయాలని ప్రతిపాదన ఉంది. ఒక్కొక్క వ్యక్తికి ₹50 నుంచి ₹100 వరకు వసూలు చేయాలని ఆలోచిస్తున్నారు. ఈ ఫీజుపై ఇంకా అధికారిక నిర్ధారణ రాలేదు.

ప్రజల నుంచి స్పందన బాగుంటే మరో 30 నుంచి 40 పార్కులకు ఈ సౌకర్యాన్ని విస్తరించాలని మున్సిపల్ కార్పొరేషన్ ఆలోచిస్తోంది.