ధాన్యం కొనుగోళ్ళు ఆగిపోవడంతో యాదాద్రి రైతులు బస్తాలకు నిప్పు పెట్టారు

యాదాద్రి భువనగిరి జిల్లా రాజాపేట మండలం సింగారం గ్రామంలో రైతులు ధాన్యం బస్తాలకు నిప్పు పెట్టి నిరసన తెలిపారు. PACs కొనుగోలు కేంద్రం ముందు ధాన్యం కుప్పలు వేసి ధర్నాకు దిగారు.

యాదాద్రి జిల్లా వ్యాప్తంగా దాదాపు 4 లక్షల మెట్రిక్ టన్నుల ధాన్యం వస్తే ఇప్పటివరకు 2 లక్షల మెట్రిక్ టన్నులు మాత్రమే కొనుగోలు అయింది. 50% ధాన్యం కొనుగోలు కేంద్రాల్లోనే పేరుకుపోయింది.

సింగారం కొనుగోలు కేంద్రంలో ఒక్కో రోజు ఒకటి రెండు లారీలు మాత్రమే కాంటాలు వేస్తున్నారు. దాదాపు 2,000 బస్తాల ధాన్యం అక్కడే పేరుకుపోయింది. లారీలు లేవని, హమాళీలు లేరని అధికారులు చెప్తున్నారని రైతులు తెలిపారు.

నెల రోజులు దాటినా ధాన్యం కాంటాలు వేయడం లేదని రైతులు వాపోతున్నారు. రోహిణి కార్తె వచ్చింది. మరో వారం రోజుల్లో వర్షాకాలం మొదలవుతుందని, అంతలోగా ధాన్యం కొనకపోతే పంట పాడైపోతుందని ఆందోళన వ్యక్తం చేస్తున్నారు.

రైతులు చేసిన అప్పులు తీర్చడానికి, వచ్చే వానకాలం సీజన్‌కు సిద్ధం కావడానికి వెంటనే కొనుగోలు జరపాలని డిమాండ్ చేస్తున్నారు. కొనుగోళ్ళు వేగంగా జరగకపోతే హైదరాబాద్-వరంగల్ రహదారిపై ధర్నా నిర్వహిస్తామని హెచ్చరించారు.

సింగారం గ్రామం జిల్లా కలెక్టరేట్‌కు దగ్గరలోనే ఉందని, అయినా అధికారులు పట్టించుకోవడం లేదని రైతులు పేర్కొన్నారు. ఈ విషయంపై జిల్లా అధికారుల స్పందన తెలియాల్సి ఉంది.