యాదాద్రి థర్మల్ పవర్ ప్లాంట్ యూనిట్ 3లో అగ్ని ప్రమాదం — ప్రాణనష్టం లేదు

నల్గొండ జిల్లా దామరచర్ల మండలం వీర్లపాలెం సమీపంలోని యాదాద్రి థర్మల్ పవర్ స్టేషన్ యూనిట్ 3లో అగ్ని ప్రమాదం సంభవించింది. టర్బైన్ డ్రివెన్ బాయిలర్ ఫీడ్ పంప్ వద్ద ఆయిల్ లీకేజ్ కారణంగా మంటలు చెలరేగినట్లు అంతర్గత సమాచారం తెలుపుతోంది. అయితే అధికారులు మాత్రం విద్యుత్ షార్ట్ సర్క్యూట్ వల్ల ప్రమాదం జరిగిందని చెప్తున్నారు.

ప్లాంట్ అంతటా దట్టమైన పొగ వ్యాపించింది. సిబ్బంది వెంటనే బయటికి వెళ్లారు. అగ్నిమాపక సిబ్బంది స్పందించి మంటలను అదుపులోకి తెచ్చారు. ఎలాంటి ప్రాణనష్టం జరగలేదని స్థానిక సిబ్బంది తెలిపారు.

యూనిట్ 3లో ఉత్పత్తి ప్రారంభమై కేవలం మూడు నుంచి నాలుగు రోజులే అయింది. ఈ వ్యవధిలోనే ప్రమాదం జరగడం అధికారులను ఆందోళనలో పెట్టింది. కంట్రోల్ కేబుళ్లు, వాల్వులు సహా యూనిట్‌కు సంబంధించిన లింక్ మెటీరియల్ భారీగా దెబ్బతిన్నట్లు తెలుస్తోంది. అయితే ప్రధాన యూనిట్లకు ఎలాంటి నష్టం జరగలేదని సమాచారం.

మొత్తం ఆస్తి నష్టం ఎంత అనేది ఇంకా స్పష్టత రాలేదు. ITPS అధికారులు విచారణ నిర్వహించిన తర్వాత పూర్తి వివరాలు తెలిసే అవకాశం ఉంది.