యాదగిరిగుట్ట ఆలయ పాలక మండలి తొలి సమావేశంలో 26 అంశాలకు ఆమోదం

తెలంగాణలోని యాదగిరిగుట్ట ఆలయ పాలక మండలి కొత్తగా ఏర్పాటైన తర్వాత తొలి సమావేశం నిర్వహించింది. ఈ సమావేశంలో ఆలయ అభివృద్ధి, భక్తుల సౌకర్యాలకు సంబంధించి 26 అంశాలకు ఆమోదం తెలిపింది.

కొండపై దీక్షాపరుల కోసం ప్రత్యేక మండపం ఏర్పాటు చేయాలని నిర్ణయించారు. నిత్య కళ్యాణ మండపం ఏర్పాటుకు కూడా ఆమోదం లభించింది. మెట్ల మార్గంలో షెడ్లు, వేద పాఠశాల ఏర్పాటు చేయనున్నారు. రాయగిరి గోశాల వద్ద భారీ కమాన్ నిర్మాణం చేపట్టాలని పాలక మండలి నిర్ణయించింది.

రోజూ 2,000 మంది భక్తులకు అన్నదానం అందించాలని నిర్ణయించారు. ఆర్జిత సేవలు, నిత్య కైంకర్యాలకు ఆన్లైన్ సౌకర్యం కల్పించాలని ఆమోదించారు. ఈ పనిని TCS ఆధ్వర్యంలో చేపట్టనున్నారు.

భక్తుల సౌకర్యాల కోసం ప్రత్యేక సబ్ కమిటీలు ఏర్పాటు చేయనున్నారు. తులసి కాటేజీలో రెండు కళ్యాణ కట్టల నిర్మాణానికి ఆమోదం తెలిపారు. గిరి ప్రదక్షిణ మార్గంలో సోలార్ విద్యుత్తు వ్యవస్థ ఏర్పాటు చేయాలని నిర్ణయించారు.