ప్రభుత్వ ఉద్యోగం వదిలి ప్రకృతి వ్యవసాయంలో లక్షల లాభాలు సాధిస్తున్న కడప రైతు

YSR కడప జిల్లా పులివెందుల మండలం కొత్తపల్లి గ్రామానికి చెందిన చంటిమి రెడ్డి యామినీ లత ప్రభుత్వ వ్యవసాయ సహాయకుడి ఉద్యోగానికి రాజీనామా చేసి ప్రకృతి వ్యవసాయం వైపు మళ్లారు. తక్కువ పెట్టుబడితో లక్షల్లో లాభాలు ఆర్జిస్తూ ఆదర్శంగా నిలుస్తున్నారు.

గతంలో గ్రామ వ్యవసాయ సహాయకుడిగా (VOA) పనిచేసిన యామినీ లత, రసాయన ఎరువుల వాడకం వల్ల నేల క్షీణించడం, రైతులు నష్టపోవడం గమనించారు. దీంతో 2018లో ఆంధ్రప్రదేశ్ కమ్యూనిటీ మేనేజ్డ్ నేచురల్ ఫార్మింగ్ (APCNF) శిక్షణ పొంది, ప్రభుత్వ ఉద్యోగానికి వీడ్కోలు పలికి ప్రకృతి వ్యవసాయం చేపట్టారు.

ప్రస్తుతం ఆమె 4.30 ఎకరాల్లో అరటిని ప్రధాన పంటగా సాగు చేస్తున్నారు. 1.20 ఎకరాల్లో ఏ గ్రేడ్ అరటికి రూ.72,000 పెట్టుబడి పెట్టగా, స్థూల ఆదాయం రూ.4,75,000 వచ్చింది. ఖర్చుల పోను నికర లాభం రూ.4,03,000. మరో 3 ఎకరాల్లో సాగు చేసిన పంటపై రూ.2,45,000 పెట్టుబడితో రూ.12,90,000 స్థూల ఆదాయం, రూ.10,44,000 నికర లాభం వచ్చింది. 20 సెంట్ల ఏటీఎం నమూనాలో కేవలం రూ.13,260 పెట్టుబడితో రూ.84,000 వరకు ఆదాయం లభించింది.

అంతర పంటలుగా ముల్లంగి, క్యారెట్, బీట్రూట్, వంకాయ, మిర్చి, ఉల్లి, ఆకుకూరలు సాగు చేస్తూ, సరిహద్దు పంటలుగా సజ్జ, గోంగూర, అలసందలు పెంచుతున్నారు. జీవామృతం, బీజామృతం, వేపనూనె వంటి సహజ కషాయాలే వాడుతూ, కీటక నివారణకు స్టిక్కీ ట్రాప్స్, ఫెరోమోన్ ట్రాప్స్ అమర్చారు.

ఆమె విజయాన్ని గుర్తించిన రైతు సాధికార సంస్థ, డివిజనల్ మోడల్ మేకర్ ట్రైనీగా నియమించింది. ప్రస్తుతం వేలాది మంది రైతులకు ప్రకృతి వ్యవసాయంపై క్షేత్రస్థాయి శిక్షణ ఇస్తున్నారు. రాష్ట్ర స్థాయి అధికారులు, విదేశీ శాస్త్రవేత్తలు కూడా ఆమె పొలాన్ని సందర్శించి ప్రశంసించారు.