మా కుటుంబంలో ముగ్గురు బలైపోయారు: జగన్మోహన్ రెడ్డి ఆరోపణలు

YSRCP అధ్యక్షుడు జగన్మోహన్ రెడ్డి TDP అధ్యక్షుడు చంద్రబాబు నాయుడుపై తీవ్ర ఆరోపణలు చేశారు. తన తాత YS రాజారెడ్డి, తండ్రి YS రాజశేఖర్ రెడ్డి, చిన్నాన్న YS వివేకానంద రెడ్డి — ముగ్గురు బలైపోయారని, తాము బాధితులమని పేర్కొన్నారు.

YS రాజారెడ్డి హత్య 1999 అసెంబ్లీ ఎన్నికలకు ఒక సంవత్సరం ముందు జరిగిందని జగన్ చెప్పారు. అప్పుడు చంద్రబాబు నాయుడు ముఖ్యమంత్రిగా ఉన్నారని, ఆ కేసులో దోషులను హైదరాబాద్‌లోని TDP కేంద్ర కార్యాలయంలో ఉంచి రక్షించారని ఆరోపించారు.

YS వివేకానంద రెడ్డి హత్య కేసులో, 'దస్తగిరి' అనే వ్యక్తి live TV show లో తానే హత్య చేశానని చెప్పాడని జగన్ పేర్కొన్నారు. ఈ వ్యక్తి ఇప్పుడు పోలీసుల అండతో స్వేచ్ఛగా తిరుగుతున్నాడని, చంద్రబాబు లాయర్ సిద్ధార్థ్ లూత్ర ఆ వ్యక్తికి కూడా లాయర్‌గా ఉన్నారని ఆరోపించారు.

YS రాజశేఖర్ రెడ్డి మరణానికి రెండు మూడు రోజుల ముందు అసెంబ్లీలో చంద్రబాబు నాయుడు 'నువ్వు అసెంబ్లీకి ఎలా వస్తావో చూస్తాను' అని అన్నారని జగన్ చెప్పారు. అనంతరం హెలికాప్టర్ ప్రమాదంలో రాజశేఖర్ రెడ్డి చనిపోయారని, ఇప్పటికీ అనేక నివృత్తి కాని అంశాలు ఉన్నాయని పేర్కొన్నారు.

జగన్ మరిన్ని ఉదాహరణలు చెప్పారు. నటుడు బాలకృష్ణ ఒక కాల్పుల ఘటనలో ఇద్దరిని కాల్చాడని, వంగవీటి మోహన్ రంగారావు హత్య కేసులో వెలగపూడి రామకృష్ణ — ప్రస్తుత TDP MLA — ప్రధాన నిందితుడని ఆరోపించారు.

పింగళి దశరథరాం అనే జర్నలిస్ట్ TDP ప్రభుత్వ అవినీతిని ప్రశ్నిస్తూ 'ఎన్కౌంటర్' పత్రిక నడిపారని, ఆయనను దారుణంగా హత్య చేశారని పేర్కొన్నారు. చంద్రబాబు తోడల్లుడు దగ్గుబాటి వెంకటేశ్వరరావు, మాజీ TDP మంత్రి హరిరామ జోగయ్య పుస్తకాలు రాశారని, ఆ పుస్తకాల్లో ఈ ఘటనల వివరాలు ఉన్నాయని జగన్ చెప్పారు.

ఈ ఆరోపణలపై TDP, చంద్రబాబు నాయుడు స్పందన తెలియాల్సి ఉంది.