జగన్ దేవరపల్లి పర్యటనకు భద్రత లేదని YSRCP నేత వనిత ఆరోపణ

వైఎస్ఆర్ కాంగ్రెస్ పార్టీ (YSRCP) నాయకుడు, మాజీ ముఖ్యమంత్రి వైఎస్ జగన్ మోహన్ రెడ్డి దేవరపల్లి (గోపాలపురం నియోజకవర్గం) పర్యటనకు వచ్చిన సందర్భంగా భద్రతా లోపం జరిగిందని YSRCP నేత తాణేటి వనిత ఆరోపించారు.

ఆమె మాట్లాడుతూ, జగన్ రాక కోసం వారం రోజుల ముందే కలెక్టర్, ఎస్పీకి లేఖలు ఇచ్చి అనుమతులు తీసుకున్నామని, సుమారు 400 మంది పోలీసులను కేటాయించినట్లు తెలిపారు. కానీ అర్ధరాత్రి ఒక్కసారిగా ఆ పోలీసు బలగాలను వెనక్కి పిలిపించారని, జగన్ హెలిప్యాడ్ వద్ద దిగే సమయానికి ఒక్క పోలీసు సిబ్బంది కూడా లేరని ఆరోపించారు.

ఈ పర్యటన పొగాకు రైతుల కష్టాలను తెలుసుకునేందుకు అని, అయితే ప్రభుత్వం కావాలనే భద్రత ఉపసంహరించి, ఏదైనా అవాంఛనీయ సంఘటన జరిగితే YSRCP, జగన్ పై నింద వేయాలని చూస్తోందని వనిత ఆరోపించారు. అలాగే, ముగ్గురు టీడీపీ ఎమ్మెల్యేలు జగన్ రాకకు ముందు విలేకరుల సమావేశం ఏర్పాటు చేసి, వస్తున్న రైతులను ‘గాంజా బ్యాచ్’, ‘బ్లేడ్ బ్యాచ్’ అంటూ వ్యాఖ్యానించారని, ఇది రైతుల ఆత్మాభిమానాన్ని దెబ్బతీసిందని మండిపడ్డారు.

వనిత మాట్లాడుతూ, పొగాకు రైతులకు గిట్టుబాటు ధర లేదని, మద్దతు ధర లేకపోవడంతో రైతులు తీవ్ర ఇబ్బందులు పడుతున్నారని తెలిపారు. ఇంతకుముందు దేవరపల్లి టుబాకో బోర్డు వద్ద ధర్నా, జంగారెడ్డి గూడెంలో ర్యాలీ నిర్వహించినా ప్రభుత్వం స్పందించలేదని పేర్కొన్నారు.

ఈ ఘటనపై రాష్ట్ర ప్రభుత్వం స్పందన తెలియాల్సి ఉంది. YSRCP నేతలు స్థానిక పోలీసులకు ఫిర్యాదు చేశారు. ఇటీవలి కాలంలో పలు పంటలకు మద్దతు ధర లేనందున రైతులు ఆత్మహత్యలకు పాల్పడుతున్నారని వనిత ఆవేదన వ్యక్తం చేశారు.