9 రోజుల పరారీలో 21 ఫోన్లు, 24 సిమ్‌లు మార్చిన YSRCP నేత అరెస్టు

మహిళా ఎస్ఐతో దురుసుగా ప్రవర్తించిన ఘటనలో పరారైన YSRCP నాయకుడు చింతాడ రవికుమార్‌ను పోలీసులు శనివారం చిలకపాలెం వద్ద అరెస్టు చేశారు. శ్రీకాకుళం జిల్లా ఆముదాలవలస మండల YSRCP సమన్వయకర్త అయిన రవికుమార్ 9 రోజుల పాటు 8 ప్రాంతాల్లో తలదాచుకుని, 21 సెల్ ఫోన్లు, 24 సిమ్ కార్డులు ఉపయోగించినట్లు పోలీసులు తెలిపారు.

పరారీ తొలుత నరసన్నపేటలో కీలక YSRCP నేతను కలిసిన రవికుమార్, 31వ తేదీ తెల్లవారుజామున విశాఖలో స్నేహితుడి ఇంటికి వెళ్లారు. ఆ తర్వాత విజయనగరం, బెంగళూరు, విజయవాడ, ఒడిస్సా, అరకు వంటి ప్రాంతాల్లో ఉన్నారు. అరకు నుంచి శ్రీకాకుళం వైపు వస్తుండగా చిలకపాలెం వద్ద పట్టుబడ్డారు. పశ్చిమ బెంగాల్ నెంబర్ కారులో ప్రయాణిస్తున్న సమయంలో పోలీసులు అదుపులోకి తీసుకున్నారు.

అనంతరం పాతపట్నం పోలీస్ స్టేషన్‌కు తరలించి ఆదివారం మధ్యాహ్నం వరకు విచారించారు. ప్రశ్నలకు 'తెలియదు', 'గుర్తులేదు' అని సమాధానమిచ్చిన రవికుమార్, పారిపోయినట్లు ఆధారాలు చూపగా మౌనంగా ఉన్నారు. ఈ కేసులో రవితో పాటు మరో నలుగురికి ఈ నెల 21వ తేదీ వరకు రిమాండ్ విధించారు.

కోర్టు విచారణకు వచ్చే సమయంలో రవి, మరో ఇద్దరు నిందితులను మహిళా ఎస్ఐలు, కానిస్టేబుళ్లు శ్రీకాకుళం ఎస్పీ కార్యాలయం నుంచి జిల్లా కోర్టు వరకు 300 మీటర్లు నడిపించారు. పోలీసు వాహనం మొరాయించడంతో ఈ పరిస్థితి ఏర్పడిందని అధికారులు వివరించారు.