కిడ్నాప్ కేసు: వైసీపీ నేత ముస్తఫా, కొడుకు అరెస్టు

వైసీపీ నేత ముస్తఫా, ఆయన కుమారుడు ముబషీర్ కిడ్నాప్ కేసులో ఎనిమిది రోజుల పరారీ తర్వాత పోలీసులకు దొరికారు. మంగళవారం తెల్లవారుజామున గుజరాత్‌లోని వడోదరలో ముస్తఫాను, కొద్దిసేపటికే హైదరాబాద్ శంషాబాద్ ఎయిర్‌పోర్టు సమీపంలో ముబషీర్‌ను అదుపులోకి తీసుకున్నారు.

పోలీసులు తెలిపిన వివరాల ప్రకారం, ఇద్దరూ గుంటూరు నుంచి పారిపోయి హైదరాబాద్ చేరుకున్నారు. అక్కడ ఆటోలు, బస్సుల్లో ప్రయాణిస్తూ స్నేహితుల ఇళ్లలో రోజుకోచోట తలదాచుకున్నారు. సిమ్‌లు మారుస్తూ బంధువులతో ఫోన్‌లో మాట్లాడుతూ ఉన్నారు. పోలీసులు తామున్న ఇంటికి చేరుకునేలోపే మరోచోటికి మారిపోయేవారు. గుర్తింపు తప్పించుకునేందుకు ముస్తఫా తన మామూలు తెల్లదుస్తులకు బదులు రంగుల చొక్కాలు ధరించాడు.

చివరికి ముస్తఫా గుజరాత్‌లోని వడోదర వెళ్లి ఓ స్నేహితుడి ఇంట్లో ఉంటున్నాడు. మంగళవారం ఉదయం పోలీసులు ఆ ఇంటిని చుట్టుముట్టి అతడిని పట్టుకున్నారు. తండ్రి దొరికాడని తెలియగానే ముబషీర్ శంషాబాద్ విమానాశ్రయం వైపు కారులో వెళుతుండగా పోలీసులు అతడిని అడ్డగించారు.

ఇద్దరినీ న్యూజువీడు కోర్టులో హాజరు పరచనున్నారు. ముస్తఫాను గురువారం, ముబషీర్‌ను శుక్రవారం కోర్టుకు తీసుకెళ్లే అవకాశం ఉంది.