డ్రైవర్ సుబ్రహ్మణ్యం హత్య కేసు: నవంబర్ 30 లోపు తీర్పు రావాలి — SPP ముప్పాడ సుబ్బారావు

రాజమహేంద్రవరం ప్రత్యేక కోర్టులో డ్రైవర్ సుబ్రహ్మణ్యం హత్య కేసు విచారణ కొనసాగుతోంది. ఈ కేసులో ప్రత్యేక పబ్లిక్ ప్రాసిక్యూటర్ (SPP) ముప్పాడ సుబ్బారావు కీలక వివరాలు వెల్లడించారు.

మృతుడి తల్లిదండ్రులు, సోదరుడు సహా ముగ్గురు సాక్షులు కోర్టు ముందు వాంగ్మూలం ఇచ్చారని SPP తెలిపారు. YSRCP MLC అనంత బాబే సుబ్రహ్మణ్యాన్ని హతమార్చారని ఈ సాక్షులు కోర్టుకు చెప్పారని పేర్కొన్నారు. అనంత బాబుకు తన కుమారుడికీ మధ్య విభేదాలు ఉన్నాయని, అనంత బాబు అక్రమాలు సుబ్రహ్మణ్యానికి తెలిసినందున హత్య జరిగిందని సాక్షులు పేర్కొన్నారు.

ఈ నెల 26వ తేదీ వరకు 12 మంది కీలక సాక్షుల వాంగ్మూలాలు నమోదు చేస్తారని SPP తెలిపారు. ఆ తర్వాత మరో నలుగురైదుగురు స్వతంత్ర సాక్షులు ఉన్నారు. CC footage పరిశీలించిన వారు, FSL నిపుణులు సహా మొత్తం 87 మంది సాక్షులు ఉన్నారు.

సుప్రీం కోర్టు ఆదేశాలు, హైకోర్టు పర్యవేక్షణ మేరకు ఈ కేసు కోసం ప్రత్యేక న్యాయస్థానం ఏర్పాటైంది. నవంబర్ 30వ తేదీ లోపు విచారణ పూర్తి చేసి తీర్పు వెలువరించాలని కోర్టుపై నిర్దేశం ఉంది. ప్రాసిక్యూషన్ తరపు సాక్షాలు ఆగస్టు లోపు పూర్తి చేయాలని, ఆ తర్వాత రెండు నెలల్లో నిందితుడి తరపు సాక్షాలు నమోదు చేయాలని SPP వివరించారు.