తిరుపతి అలిపిరిలో చిరువ్యాపారులకు మద్దతుగా YSRCP నిరసన

తిరుపతి: అలిపిరి జూ పార్క్ బైపాస్ రోడ్ పక్కన ఉన్న చిన్న వ్యాపారుల దుకాణాలను అధికారులు తొలగించడంతో, వారికి మద్దతుగా YSRCP నేతలు, కార్యకర్తలు నిరసన చేపట్టారు.

వారం రోజుల క్రితం ఈ రహదారికి ఇరువైపుల ఉన్న సుమారు 50 నుంచి 70 చిరు వ్యాపారుల షాపులు, హోటళ్లు, బండ్లను అధికారులు తొలగించారు. వ్యాపారులకు జీవనోపాధి కోల్పోయినందుకు ధర్నా నిర్వహించినట్లు YSRCP నాయకులు తెలిపారు.

పోలీస్ యాక్ట్ 30 అమలులో ఉందని, సభలు, ర్యాలీలు, ధర్నాలు నిర్వహించరాదని పోలీసులు హెచ్చరించారు. నిబంధనలు ఉల్లంఘిస్తే కఠిన చర్యలు తప్పవని తెలిపారు. అయినప్పటికీ YSRCP నేతలు, కార్యకర్తలు పెద్ద సంఖ్యలో చేరుకున్నారు.

దీంతో పోలీసులు వారిని అడ్డుకునే ప్రయత్నం చేశారు. దాదాపు 50 మంది YSRCP కార్యకర్తలను అదుపులోకి తీసుకొని, అలిపిరి, వెస్ట్ తదితర పోలీస్ స్టేషన్లకు తరలించారు. ఈ క్రమంలో కొంత ఉద్రిక్తత నెలకొంది. చిరు వ్యాపారులకు న్యాయం జరిగేంతవరకు పోరాడతామని YSRCP నేతలు చెప్పారు.