వరంగల్‌లో 67 భవిత కేంద్రాల ద్వారా దివ్యాంగ పిల్లలకు విద్య, ఫిజియోథెరపీ

వరంగల్ జిల్లాలో సమగ్ర శిక్ష అభియాన్ కింద 67 భవిత భరోసా కేంద్రాలను ప్రభుత్వం ఏర్పాటు చేసింది. ఈ కేంద్రాల్లో 3,047 మంది దివ్యాంగ విద్యార్థులకు శిక్షణ అందుతోంది.

హనుమకొండలోని భీమవరం కేంద్రంలో మాట రాని పిల్లలకు స్పీచ్ థెరపీ ఇస్తున్నారు. నడవలేని పిల్లలకు ఫిజియోథెరపీ అందిస్తున్నారు. అక్షరాలు, ఓనమాలు కూడా నేర్పిస్తున్నారు.

ఈ కేంద్రాన్ని ఒక నెల క్రితం DEO గిరిరాజ్ గౌడ్, స్థానిక MLAలు ప్రారంభించారు. రిసోర్స్ పర్సన్ వీరస్వామి ప్రకారం RPWD యాక్ట్ గుర్తించిన 21 రకాల వైకల్యాలున్న పిల్లలు ఇక్కడికి వస్తున్నారు. ఆటిజం, వినికిడి లోపం, మాట సమస్యలు, మేధో వైకల్యం ఉన్న పిల్లలు ఎక్కువగా ఉన్నారు.

ప్రతి బుధవారం, శనివారం ఫిజియోథెరపీ క్యాంపు నిర్వహిస్తున్నారు. ఫిజియోథెరపిస్ట్ మాట్లాడుతూ సెరిబ్రల్ పాల్సీ, ఎపిలెప్సీ కేసులు ఎక్కువగా వస్తున్నాయని తెలిపారు. నడక ఆలస్యమైన పిల్లలకు స్ట్రెచింగ్, బలోపేత వ్యాయామాలు వాడుతున్నారు. చికిత్స తొందరగా ప్రారంభిస్తే రికవరీ మెరుగ్గా ఉంటుందని ఆయన చెప్పారు.

ప్రస్తుతం ఈ కేంద్రంలో 18 మంది పిల్లలు ఎన్రోల్ అయ్యారు. వీరిలో 11 నుంచి 12 మంది రెగ్యులర్‌గా వస్తున్నారు. తల్లిదండ్రులు తమ పిల్లల్లో మెరుగుదల కనిపిస్తోందని చెబుతున్నారు. కొందరు పిల్లలు ఇప్పుడు అక్షరాలు రాయగలుగుతున్నారు. కొందరు ఎక్కువసేపు కూర్చోగలుగుతున్నారు.