ఏపీలో 7 కొత్త కరోనా కేసులు నమోదు, యాక్టివ్ సంఖ్య 39కి చేరింది

ఆంధ్రప్రదేశ్‌లో కరోనా కేసులు స్వల్పంగా పెరిగాయి. తాజాగా రాష్ట్రంలో 7 కొత్త పాజిటివ్ కేసులు నమోదయ్యాయి. దీంతో రాష్ట్రవ్యాప్తంగా యాక్టివ్ కేసుల సంఖ్య 39కి చేరింది.

ఆరోగ్య శాఖ ప్రజలను అప్రమత్తంగా ఉండాలని సూచించింది. జ్వరం, దగ్గు, గొంతు నొప్పి లక్షణాలు కనిపిస్తే వెంటనే వైద్యులను సంప్రదించాలని కోరింది. వ్యాధి తీవ్రత తక్కువగా ఉండడంతో, మెజారిటీ రోగులు హోమ్ ఐసోలేషన్‌లో చికిత్సతో కోలుకుంటున్నారు. గుండె, బీపీ, మధుమేహం వంటి దీర్ఘకాలిక వ్యాధులు ఉన్నవారు మాత్రం మరింత జాగ్రత్తగా ఉండాలని వైద్యాధికారులు హెచ్చరిస్తున్నారు. రాష్ట్రంలో చాలా మందికి వ్యాక్సినేషన్ పూర్తి కావడంతో, కోవిడ్ ప్రభావం తీవ్రంగా ఉండదని వైద్యులు పేర్కొంటున్నారు.

ప్రస్తుతం రాష్ట్రంలో కోవిడ్ పరీక్షల సంఖ్య తక్కువగా ఉండడంతో, వాస్తవ కేసుల సంఖ్య మరింత ఎక్కువగా ఉండే అవకాశం ఉంది. జిల్లా కేంద్రాలు, ప్రధాన ఆసుపత్రులు, ప్రైవేట్ ల్యాబ్‌లలో మాత్రమే పరీక్షలు అందుబాటులో ఉన్నాయి. ప్రాంతీయ ఆసుపత్రుల్లో కిట్లు ఇంకా అందుబాటులో లేవు.

ఇటీవల నమోదైన కేసుల్లో ఒమిక్రాన్ సబ్ వేరియంట్ RF.5 ఉన్నట్టు వైరాలజీ ల్యాబ్ శాంపిల్స్‌లో గుర్తించారు. ఈ వేరియంట్ వేగంగా వ్యాపించే అవకాశం ఉన్నప్పటికీ, ప్రమాదకరం కాదని డబ్ల్యూహెచ్‌వో, నిపుణులు తెలిపారు. ప్రజలు మాస్క్ ధరించడం, సమావేశాల్లో దూరం పాటించడం వంటి జాగ్రత్తలు తీసుకోవాలని వైద్యులు సూచిస్తున్నారు.