అమృత్ భారత్ స్టేషన్ పథకం కింద ఆంధ్రప్రదేశ్‌లో 73 రైల్వే స్టేషన్ల అభివృద్ధి

దక్షిణ కోస్తా రైల్వే CPRO బాలాజీ కిరణ్ మాట్లాడుతూ, అమృత్ భారత్ స్టేషన్ పథకం కింద ఆంధ్రప్రదేశ్‌లో మొత్తం 73 రైల్వే స్టేషన్లను అభివృద్ధి చేస్తున్నట్లు వెల్లడించారు. ఈ పథకం కింద రాయనపాడు రైల్వే స్టేషన్‌ను సుమారు 25 కోట్ల రూపాయల వ్యయంతో అభివృద్ధి చేశారు. ప్రయాణికుల సౌకర్యాలను మెరుగుపరచడానికి అవసరమైన సదుపాయాలన్నీ అందించారు. మంగళగిరి స్టేషన్‌కు 12 కోట్ల 60 లక్షల రూపాయలతో రెండో ప్రవేశద్వారాన్ని అభివృద్ధి చేశారు. ఆ రెండో ప్రవేశద్వారంలో వెయిటింగ్ హాల్, ప్రయాణికుల వేచి ఉండే ప్రాంతం, టికెటింగ్ ప్రాంతం, రెండు లిఫ్ట్‌లు కూడా ఏర్పాటు చేశారు. కంబం స్టేషన్‌లో 11 కోట్ల రూపాయల వ్యయంతో పునరభివృద్ధి పనులు పూర్తయ్యాయి. ప్రధాని నరేంద్ర మోదీ వీడియో కాన్ఫరెన్స్ ద్వారా ఈ స్టేషన్లను ప్రారంభిస్తారని బాలాజీ కిరణ్ తెలిపారు. జూలై 17వ తేదీ శుక్రవారం నాడు ఈ మూడు స్టేషన్లలోనూ స్థానిక కార్యక్రమాలు జరుగుతాయని, తర్వాత ప్రధానమంత్రి వీడియో కాన్ఫరెన్స్ ద్వారా వాటిని ప్రారంభిస్తారని ఆయన వివరించారు. దక్షిణ కోస్తా రైల్వే ఏర్పడిన తర్వాత జరుగుతున్న మొట్టమొదటి ప్రధాన కార్యక్రమం ఇదేనని, స్థానిక ప్రజల మద్దతు ఆశిస్తున్నట్లు బాలాజీ కిరణ్ పేర్కొన్నారు.