బద్రీనాథ్-కేదార్నాథ్ ప్రయాణం సులభం: 900 మీటర్ల టన్నెల్ నిర్మాణం పూర్తి

ఉత్తరాఖండ్ రుద్రప్రయాగ్ జిల్లాలో 900 మీటర్ల పొడవైన సొరంగం (టన్నెల్) నిర్మాణం పూర్తయింది. బద్రీనాథ్, కేదార్నాథ్‌లకు వెళ్లే యాత్రికుల ప్రయాణ సమయాన్ని తగ్గించే లక్ష్యంతో ఈ ప్రాజెక్టు నిర్మించారు.

ఈ టన్నెల్‌ను అనుసంధానిస్తూ అలకనంద నదిపై 200 మీటర్ల పొడవైన వంతెన నిర్మాణం కూడా చివరి దశకు చేరుకుంది. రెండూ పూర్తయితే కేదార్నాథ్, బద్రీనాథ్ జాతీయ రహదారులు ఒకదానితో ఒకటి అనుసంధానమవుతాయి.

రుద్రప్రయాగ్ పట్టణంలో ప్రధాన మార్కెట్ గుండా వెళ్లే ట్రాఫిక్ కారణంగా యాత్రికులు గంటల తరబడి జాముల్లో చిక్కుకుంటున్నారు. ఈ సమస్యను పరిష్కరించేందుకు కేంద్ర ప్రభుత్వం ఈ ప్రాజెక్టును చేపట్టింది.

కొత్త టన్నెల్ అందుబాటులోకి వస్తే, యాత్రికులు మార్కెట్ గుండా వెళ్లాల్సిన అవసరం ఉండదు. దీంతో ప్రయాణ సమయం గణనీయంగా తగ్గడంతోపాటు పట్టణంలో రద్దీ కూడా తగ్గుతుంది.