భోగాపురం విమానాశ్రయం ఆగస్టు 1న ప్రారంభం; ప్రధాని మోదీ ప్రారంభించనున్నారు

భోగాపురం అంతర్జాతీయ విమానాశ్రయం ఆగస్టు 1న ప్రారంభం కానుంది. ప్రధాని నరేంద్ర మోదీ ఈ విమానాశ్రయాన్ని ప్రారంభిస్తారు. ముఖ్యమంత్రి చంద్రబాబు నాయుడు కూడా ఈ కార్యక్రమంలో పాల్గొంటారు.

2,200 ఎకరాలకు పైగా విస్తీర్ణంలో రూ.4,750 కోట్ల వ్యయంతో ఈ విమానాశ్రయం నిర్మించారు. తొలిదశలో ఏడాదికి 60 లక్షల మంది ప్రయాణికులను నిర్వహించే సామర్థ్యం ఉంది. రన్వే, ఎయిర్ ట్రాఫిక్ కంట్రోల్ టవర్, టాక్సీ వేలు, టర్మినల్ భవనం, యాక్సెస్ రోడ్లు వంటి మౌలిక సదుపాయాలు పూర్తయ్యాయి. ట్రైల్ రన్ విజయవంతంగా పూర్తయింది. కీలక అనుమతులు కూడా లభించాయి.

ఈ విమానాశ్రయం విజయనగరం, విశాఖపట్నం, శ్రీకాకుళం జిల్లాలతో పాటు ఒడిశా సరిహద్దు ప్రాంతాలకు సేవలు అందించనుంది. ప్రస్తుతం విశాఖ విమానాశ్రయం నావీ ఆధీనంలో ఉండటంతో అంతర్జాతీయ సేవలు పరిమితంగా ఉన్నాయి. భోగాపురం విమానాశ్రయం ప్రారంభంతో దేశీయ, అంతర్జాతీయ విమాన సేవలు విస్తరిస్తాయని అధికారులు భావిస్తున్నారు.

ఈ ప్రాజెక్టు వలన పరిశ్రమలు, ఐటి, లాజిస్టిక్స్, పర్యాటకం, విద్య, వైద్య రంగాల్లో కొత్త అవకాశాలు వస్తాయని అధికారులు అంచనా వేస్తున్నారు. వేలాది ప్రత్యక్ష, పరోక్ష ఉద్యోగాలు లభిస్తాయని, భారీ పెట్టుబడులు వచ్చే అవకాశం ఉందని వారు చెప్తున్నారు.

విమానాశ్రయ టర్మినల్‌ను ఆంధ్రప్రదేశ్ సంస్కృతి, ముఖ్యంగా ఉత్తరాంధ్ర జానపద కళలు ప్రతిబింబించేలా రూపొందించారు. ప్రారంభ కార్యక్రమాన్ని ఘనంగా నిర్వహించాలని సీఎం చంద్రబాబు అధికారులను ఆదేశించారు.