డీఎస్పీ భీమారెడ్డి కేసులో మరో నలుగురు పోలీస్‌ అధికారులపై ఏసీబీ దృష్టి

డీఎస్పీ భీమారెడ్డి అక్రమాస్తుల కేసు దర్యాప్తు సందర్భంగా ఏసీబీ మరో నలుగురు పోలీస్ అధికారులపై దృష్టి సారించింది. వీరి ఆస్తులు, జీవనశైలిపై ఏసీబీ అధికారులు సమాచారం సేకరించినట్లు తెలిసింది.

ఈ నలుగురు అధికారులు సబ్‌-ఇన్‌స్పెక్టర్లుగా చేరి ప్రస్తుతం డీఎస్పీ లేదా అదనపు ఎస్పీ హోదాలో ఉన్నారు. వారిలో కొందరు ప్రస్తుతం లూప్‌లైన్‌లో ఉన్నట్లు సమాచారం. భీమారెడ్డి నివాసంపై ఏసీబీ దాడిలో సుమారు 200 కోట్ల విలువైన ఆస్తులు గుర్తించిన నేపథ్యంలో ఈ చర్య తీసుకున్నారు.

పోలీస్ శాఖలోని పలువురు అధికారులు బినామీలుగా వ్యవహరిస్తూ అక్రమంగా సంపద కూడబెట్టారన్న ఆరోపణలు వెల్లువెత్తుతున్నాయి. ఈ నలుగురి అక్రమాస్తులకు సంబంధించిన ఫైళ్లు సిద్ధం చేసినట్లు ఏసీబీ వర్గాలు తెలిపాయి.

త్వరలోనే వారిని విచారించి, మరిన్ని వివరాలు వెలుగులోకి తెచ్చే అవకాశం ఉంది. భీమారెడ్డి ప్రస్తుతం డీజీపీ కార్యాలయంలో కంప్యూటర్స్ విభాగంలో డీఎస్పీగా పనిచేస్తున్నారు.