ఒంగోలులో ACB మెరుపు దాడులు: 13 మంది పట్టణ ప్రణాళిక విభాగం ఉద్యోగుల ఇళ్లలో సోదాలు

ఒంగోలు నగర పట్టణ ప్రణాళిక విభాగంలో పనిచేస్తున్న 13 మంది ఉద్యోగుల నివాసాల్లో అవినీతి నిరోధక శాఖ (ACB) అధికారులు శుక్రవారం ఉదయం నుంచి ఏకకాలంలో సోదాలు నిర్వహిస్తున్నారు. నిర్మాణ అనుమతుల కోసం వచ్చే పౌరుల నుంచి లంచాలు తీసుకుంటున్నారని ఆరోపణలు రావడంతో ఈ చర్యలు తీసుకున్నారు.

మార్చి 9 నుంచి 12 తేదీల మధ్య ACB అధికారులు ఒంగోలు నగర పట్టణ ప్రణాళిక కార్యాలయంపై తనిఖీలు చేపట్టారు. అప్పుడు సేకరించిన మొబైల్ ఫోన్ల డేటా మరియు దస్తావేజుల ఆధారంగా కొంతమంది ఉద్యోగులు అవినీతికి పాల్పడ్డారని నిర్ధారణకు వచ్చారు. ఆ నివేదికను ప్రభుత్వానికి సమర్పించగా, ప్రభుత్వం సంబంధిత అధికారులపై చర్యలు తీసుకోవాలని ACB కి ఆదేశాలు జారీ చేసింది.

ఆ ఆదేశాల మేరకే ఈరోజు ఒంగోలు నగరంలోని వివిధ ప్రాంతాల్లో ఉన్న 13 మంది పట్టణ ప్రణాళిక అధికారుల ఇళ్లలో ACB సోదాలు జరుగుతున్నాయి. సోదాల సమయంలో సిబ్బంది చరవాణులు స్వాధీనం చేసుకుని, ఇంట్లో ఉన్నవారిని బయటకు వెళ్లనివ్వకుండా క్షుణ్ణంగా తనిఖీ చేస్తున్నారు.

ఉద్యోగుల ఆస్తుల వివరాలు, నగదు, బంగారం లాంటి వాటిని జీతభత్యాలతో పోల్చి ఆదాయానికి మించిన ఆస్తులు ఉన్నాయేమోనని పరిశీలిస్తున్నారు. సేకరించిన ఆధారాలన్నింటినీ కంప్యూటర్లో నమోదు చేస్తున్నారు. సాయంత్రానికి దర్యాప్తు పూర్తయి, ఎవరెవరు ఎంత మేర అవినీతికి పాల్పడ్డారో వెల్లడి అయ్యే అవకాశం ఉందని ACB అధికారులు తెలిపారు.

ఇల్లు నిర్మించుకోవడానికి అనుమతుల కోసం వచ్చిన పౌరులు లంచాలు చెల్లించలేక తీవ్ర ఆవేదనకు గురయ్యారని, అందుకే ACB ని ఆశ్రయించారని తెలుస్తోంది.