మెటాతో కేంద్రం సమావేశం: డీప్ ఫేక్ వీడియోలు, కంటెంట్ మోడరేషన్‌పై చర్చ

డీప్ ఫేక్ వీడియోలు, అభ్యంతరకర కంటెంట్ విషయంలో మెటా ప్రతినిధులతో కేంద్రం సమావేశం జరిపింది. ఫేస్‌బుక్ వంటి ప్లాట్ఫామ్లు కేవలం గ్లోబల్ పాలసీలపై ఆధారపడకుండా భారత చట్టాలకు లోబడి పనిచేయాలని కేంద్రం స్పష్టం చేసింది.

ప్రముఖులకు సంబంధించిన డీప్ ఫేక్ వీడియోలపై కేంద్రం ఆందోళన వ్యక్తం చేసింది. మెటా ఆల్గరిథంను పూర్తిగా మార్చాలని ప్రభుత్వం ఆదేశించిందన్న వార్తలను అవాస్తవమని కేంద్రం తేల్చి చెప్పింది. అయితే, ప్లాట్ఫామ్లు స్థానిక చట్టాలకు అనుగుణంగా ఉండాలనేది కేంద్రం పునరుద్ఘాటించింది.

భారత సంస్కృతి, స్థానిక భాషల పట్ల మెటా బృందాలకు అవగాహన లోపించిందని, కంటెంట్ మోడరేషన్ మెరుగుపరిచేందుకు స్థానికుల నుండి సమాచారం తీసుకోవాలని ప్రభుత్వం సూచించింది. పిల్లలపై లైంగిక వేధింపుల కంటెంట్ విషయంలో జీరో టాలరెన్స్ పాటించాలని తేల్చి చెప్పింది.

అధికారిక వెరిఫైడ్ ఖాతాల నుండి వచ్చే కంటెంటును ఆల్గరిథమ్స్ పొరపాటున డీప్ ఫేకులుగా గుర్తించకుండా చూడాలని కోరింది. ఆటోమేటెడ్ సిస్టమ్స్ బదులు నిర్ణయం తీసుకునే ముందు మానవ పర్యవేక్షణ ఉండాలని కేంద్రం నొక్కిచెప్పింది.

తొలగించిన ఫేక్ కంటెంట్ మళ్ళీ ప్లాట్ఫామ్‌లోకి రావడం, ఆల్గరిథమ్స్ వాటిని ప్రమోట్ చేయడంపై మెటాను ప్రభుత్వం ప్రశ్నించింది. సాంకేతిక అంశాలపై వచ్చేవారం మళ్ళీ సమావేశం జరుగుతుందని సమాచారం.