ల్యాండ్ రికార్డ్స్ డీడీ ఇంట్లో ACB సోదాలు: రూ.1.54 కోట్ల నగదు, కిలో బంగారం స్వాధీనం

హైదరాబాద్‌లోని ల్యాండ్ రికార్డ్స్ అండ్ సర్వే సెటిల్‌మెంట్ డిప్యూటీ డైరెక్టర్ సుంకరి నరహరి రావు నివాసంలో ACB అధికారులు సోదాలు జరిపారు. ఆదాయానికి మించిన ఆస్తులు కూడబెట్టారన్న ఆరోపణలపై ఈ సోదాలు చేపట్టినట్లు ACB డీఎస్పీ శ్రీధర్ తెలిపారు. సోదాల్లో అతని ఇంట్లో రూ.1.54 కోట్ల నగదు, ఒక కిలో బంగారు ఆభరణాలు, వెండి ఆభరణాలు స్వాధీనం చేసుకున్నారు.

ఉదయం 6 గంటల నుంచి నరహరి నివాసంతో సహా మొత్తం 12 ప్రాంతాల్లో సోదాలు నిర్వహించారు. అతని ఇంట్లోనే ప్రధానంగా నగదు, బంగారం లభించగా, ఇతర ప్రాంతాల్లో ఎలాంటి నగదు దొరకలేదని డీఎస్పీ వెల్లడించారు. ఇంట్లో రెండు లాకర్లు కూడా గుర్తించగా, వాటిని రేపు లేదా ఎల్లుండి తెరవనున్నామని చెప్పారు.

నరహరి పేరు మీద, అతని సోదరుడు, కుమారుడు, కుమార్తెల పేరిట పలు రియల్ ఎస్టేట్ పెట్టుబడులు ఉన్నట్లు ACB గుర్తించింది. గచ్చిబౌలి, అత్తాపూర్, మియాపూర్ ప్రాంతాల్లో ప్లాట్లు, రంగారెడ్డి జిల్లాలో వ్యవసాయ భూములు, నారాయణగూడలో రిమాక్స్ రియాలిటీ, ఛాంపియన్ రియల్ ఎస్టేట్ కార్యాలయాల్లో పెట్టుబడులు పెట్టినట్లు సమాచారం. ప్రస్తుతం స్వాధీనం చేసుకున్న ఆస్తుల మార్కెట్ విలువ రూ.200 కోట్లకు పైగా ఉంటుందని అధికారులు పేర్కొన్నారు. ప్రభుత్వ లెక్కల ప్రకారం ఇప్పటివరకు స్వాధీనం చేసుకున్న ఆస్తుల విలువ దాదాపు రూ.5 కోట్లు ఉంటుందని, మార్కెట్ విలువ ఇంకా ఎక్కువగా ఉంటుందని తెలిపారు.

నరహరి తన వద్ద లభించిన నగదు ఒక అపార్ట్‌మెంట్ విక్రయానికి పొందిన అడ్వాన్స్ అని చెప్పినట్లు డీఎస్పీ వెల్లడించారు. అయితే ఆ డబ్బు ఇచ్చిన వ్యక్తి అందుబాటులో లేడని, దర్యాప్తు కొనసాగుతోందని తెలిపారు. నిన్ననే డీఏ (డిస్ప్రపోర్షనల్ అసెట్స్) కేసు నమోదు చేసి, ఈ ఉదయం సోదాలు ప్రారంభించినట్లు చెప్పారు. నరహరిని అరెస్ట్ చేసి, రేపు ఉదయం కోర్టులో ప్రవేశపెట్టనున్నట్లు డీఎస్పీ శ్రీధర్ తెలిపారు.

ఈ కేసులో పూర్తి వివరాలు త్వరలో ప్రెస్ నోట్ ద్వారా వెల్లడిస్తామని ACB తెలిపింది. నరహరిపై గతంలో రంగారెడ్డి జిల్లాలో పనిచేసిన సమయంలోనూ అవినీతి ఆరోపణలు వచ్చినట్లు సమాచారం.