నాగర్‌కర్నూల్ డీఈ సత్యనారాయణ ఇళ్లు, కార్యాలయాల్లో ACB సోదాలు

నాగర్‌కర్నూల్ జిల్లా నీటిపారుదల శాఖ డిప్యూటీ ఎగ్జిక్యూటివ్ ఇంజనీర్ (DEE) ఆర్. సత్యనారాయణ నివాసాలు, కార్యాలయాల్లో ACB (అవినీతి నిరోధక శాఖ) అధికారులు సోదాలు చేస్తున్నారు. ఆదాయానికి మించిన ఆస్తులు కూడబెట్టారన్న ఆరోపణలపై ఈ సోదాలు జరుగుతున్నాయి.

ఉదయం 10 గంటల నుంచి సోదాలు మొదలయ్యాయి. దాదాపు 10 ప్రత్యేక బృందాలు ఈ దాడుల్లో పాల్గొంటున్నాయి. అధికారులు ముందుగా కేసు నమోదు చేశారు. ఆ తర్వాత బృందాలను రంగంలోకి దించారు.

నాగర్‌కర్నూల్‌లోని ఆయన నివాసం, కార్యాలయంతో పాటు హైదరాబాద్ కర్మన్‌ఘాట్‌లోని నివాసంలోనూ సోదాలు జరుగుతున్నాయి. బంధువులు, సన్నిహితుల ఇళ్లలోనూ ఏకకాలంలో తనిఖీలు చేస్తున్నారు. బ్యాంకు ఖాతాలు, కీలక పత్రాలను అధికారులు పరిశీలిస్తున్నారు. ఇప్పటివరకు కొన్ని ముఖ్యమైన పత్రాలతో పాటు నగదు, విలువైన ఆభరణాలు లభించినట్లు సమాచారం.

బినామీల పేరుతో ఆస్తులు ఉన్నాయా అనే అంశంపైనూ ACB దృష్టి సారించింది. సోదాలు సాయంత్రం వరకు కొనసాగే అవకాశం ఉంది. సోదాలు ముగిసిన తర్వాత సత్యనారాయణను అరెస్టు చేసి కోర్టులో హాజరుపరచనున్నట్లు సమాచారం. ఆస్తుల విలువ ఎంత అనేది సోదాలు పూర్తయిన తర్వాత స్పష్టమవుతుంది.