అధిక మాసం ప్రదోష వ్రతం: తిరునల్లారు శనేశ్వర క్షేత్రంలో స్వర్ణ కాకి వాహన సేవ

అధిక మాసంలో శుక్ల పక్షం త్రయోదశి తిధి రోజున ప్రదోష వ్రతం ఆచరిస్తారు. ఇదే రోజున తమిళనాడులోని తిరునల్లారు శనేశ్వర క్షేత్రంలో స్వర్ణ కాకి వాహన సేవ నిర్వహిస్తారు.

ప్రదోష వ్రతం అంటే శుక్ల పక్షం లేదా బహుళ పక్షంలో సాయంకాలం త్రయోదశి వచ్చినప్పుడు శివ పూజ చేయడం. పురాణాల ప్రకారం, దేవదానవులు క్షీరసాగర మధనం తర్వాత విడుదలైన హాలాహలాన్ని పరమేశ్వరుడు స్వీకరించాడు. అందుకు ముక్కోటి దేవతలు త్రయోదశి రోజు సాయంకాలం శివుడికి కృతజ్ఞతలు తెలిపారు. అప్పటి నుండి ఈ వ్రతం ప్రారంభమైందని చెప్తారు.

అధిక మాసంలో చేసే పూజలు మామూలు సమయంలో కంటే వేల రెట్లు ఫలితాన్ని ఇస్తాయని శాస్త్రం చెప్తుంది. ప్రదోష వ్రతం రోజున పగలు ఉపవాసం ఉండి, సాయంకాలం శివాభిషేకం చేసి, నైవేద్యం సమర్పించాలని సంప్రదాయం.

తిరునల్లారు క్షేత్రంలో నలతీర్థం అనే పేరుతో ఒక తీర్థం ఉంది. పురాణాల ప్రకారం, నల మహారాజు శని ప్రభావం వల్ల కష్టాలు పడినప్పుడు ఈ తీర్థంలో స్నానం చేసి తన పూర్వ వైభవాన్ని తిరిగి పొందాడని స్థల పురాణం చెప్తుంది. ఈ తీర్థంలో స్నానం చేసి తడి వస్త్రాలతో శనేశ్వర దర్శనం చేసుకోవడం ఆనవాయితీ.

శనేశ్వరుడి వాహనం కాకి. కాకభుషుండి అనే మహర్షి శాపవశాన కాకిగా మారిపోయాడని, విష్ణుమూర్తి అనుగ్రహంతో శనేశ్వరుడికి వాహనం అయ్యాడని పౌరాణిక గ్రంథాలు చెప్తాయి. కాకి పితృ పక్షిగా పరిగణించబడుతుంది. కర్మ ఫలితాలు అనుభవింపజేసే శనేశ్వరుడికి పితృ పక్షియైన కాకి వాహనంగా ఉందని చెప్తారు.

ఇంట్లో దీపారాధన చేసిన తర్వాత శని గాయత్రి మంత్రాన్ని 21 సార్లు పటించవచ్చు. ఆ మంత్రం: ఓం కాగధ్వజాయ విద్మహే ఖడ్గహస్తాయ ధీమహి తన్నో మందః ప్రచోదయాత్.