ఆదిలాబాద్‌లో భారీ వర్షాలు: పంట పొలాలు మునిగాయి

ఆదిలాబాద్ జిల్లాలో కురిసిన భారీ వర్షాలతో డోలారా, పెండల్వాడ, మండగాడ గ్రామాల్లో పంట పొలాలు నీట మునిగాయి. దీంతో ఈ ప్రాంతంలో సాగు చేసిన పత్తి, సోయాబీన్ పంటలకు తీవ్ర నష్టం వాటిల్లింది.

డోలారా గ్రామంలో ఒక్క 200 ఎకరాల పంట మునిగిపోగా, మొత్తం మూడు గ్రామాల్లోనూ నష్టం పెద్ద ఎత్తున ఉంటుందని రైతులు అంచనా వేశారు. రైతులు ఎకరానికి రూ.15,000 నుంచి రూ.50,000 వరకు పెట్టుబడి పెట్టినట్లు తెలిపారు. వరద ప్రవాహం కారణంగా వ్యవసాయానికి సంబంధించిన సాగునీటి పైపులు కూడా కొట్టుకుపోయాయి.

గత రెండేళ్లుగా ఇలాంటి వరదలతో పంటలకు నష్టం జరుగుతూనే ఉందని రైతులు చెబుతున్నారు. ప్రస్తుతం పంట నుంచి ఫలితం రాదని, తిరిగి పంట వేసే స్థితిలో లేమని వారు ఆందోళన చెందుతున్నారు.

ప్రభుత్వం సత్వరమే స్పందించి నష్టపరిహారం అందించాలని రైతులు కోరుతున్నారు.