ఆదిలాబాద్‌లో ₹58 కోట్లతో నిర్మించిన ఐటీ టవర్ ప్రారంభం ఎప్పుడు?

ఆదిలాబాద్ జిల్లా కేంద్రంలో సుమారు ₹58 కోట్ల వ్యయంతో నిర్మించిన ఐటీ టవర్ పూర్తయింది. అయితే ఇప్పటివరకు దీని ప్రారంభోత్సవం జరగలేదు.

2023లో టీజీ ఐఐసీ (తెలంగాణ పారిశ్రామిక మౌలిక సదుపాయాల సంస్థ) పర్యవేక్షణలో ఈ టవర్ నిర్మాణం ప్రారంభమైంది. 44వ నెంబర్ జాతీయ రహదారికి ఆనుకొని సర్వే నంబర్ 72లో మూడు ఎకరాల స్థలంలో దీనిని కట్టారు. తొలుత ₹40 కోట్ల అంచనా వ్యయంతో మొదలైన పనులు, అన్ని హంగులతో కలిపి ₹58 కోట్లయింది.

ఈ నాలుగు అంతస్తుల భవనంలో కిచెన్, పార్కింగ్, విద్యుత్, ఇంటర్నెట్ వంటి మౌలిక సదుపాయాలు ఉన్నాయి. మూడు షిఫ్టుల్లో దాదాపు 2,000 మంది పనిచేసేందుకు వీలు ఉంది. టవర్ అందుబాటులోకి వస్తే సాఫ్ట్‌వేర్ కంపెనీలకు మూడేళ్లపాటు అద్దె ఉండదు. ఇప్పటికే ప్రభుత్వ సహకారంతో రెండు ఐటీ కంపెనీలు ఆదిలాబాద్‌లో పనిచేస్తున్నాయి. ఆ సంస్థల ప్రతినిధులు టవర్ కేటాయిస్తే తమ కార్యాలయాలు అక్కడికే మార్చాలని ఎదురుచూస్తున్నారు.

"ప్రస్తుతం మేము ప్రైవేటు అద్దె భవనంలో ఉన్నాము. ప్రభుత్వ టవర్ ఇస్తే అద్దె ఖర్చు తగ్గి, ఉద్యోగాలు పెరుగుతాయి. ముఖ్యంగా కుటుంబంతో ఉంటూ పనిచేసే మహిళా ఉద్యోగులకు ఇది సహాయకారిగా ఉంటుంది" అని ఒక కంపెనీ ప్రతినిధి తెలిపారు.

స్థానిక యువత కూడా ఐటీ టవర్ ప్రారంభంపై ఆశలు పెట్టుకుంది. "నేను ఇప్పుడు ఇక్కడే ఐటీ జాబ్ చేస్తున్నాను. ఇక్కడ ప్రాజెక్టులు వస్తున్నాయి. ఐటీ టవర్ వచ్చాక మరిన్ని అవకాశాలు వస్తాయి" అని ఒక యువతి చెప్పారు. ప్రభుత్వం ద్వితీయ శ్రేణి నగరాలకు ఐటీ రంగాన్ని విస్తరించాలని భావిస్తోంది. అందులో భాగంగానే ఆదిలాబాద్‌లో ఈ టవర్ నిర్మించింది.

టవర్ నిర్మాణం పూర్తయినప్పటికీ ప్రభుత్వం నుంచి కేటాయింపుపై స్పష్టత లేదు. దీని ప్రారంభం ఎప్పుడు అవుతుందనేది ఇంకా తెలియాల్సి ఉంది. ప్రారంభం కోసం స్థానిక కంపెనీలు, యువత ఎదురు చూస్తున్నారు.