ఆదిలాబాద్‌లో 58 కోట్లతో నిర్మించిన ఐటీ టవర్ ప్రారంభం ఆలస్యం

ఆదిలాబాద్ జిల్లా కేంద్రంలో 58 కోట్ల రూపాయలతో నిర్మించిన ఐటీ టవర్ ఇంకా ప్రారంభం కాలేదు. ఈ భవనం పూర్తయి అన్ని సౌకర్యాలు సిద్ధంగా ఉన్నా ప్రారంభోత్సవం జరగడం లేదు.

NH-44 సమీపంలోని సర్వే నంబర్ 72లో మూడెకరాల్లో ఈ టవర్ నిర్మించారు. 40 కోట్ల అంచనాతో మొదలైన పనులు అన్ని వసతులు కల్పించే సరికి 58 కోట్లకు చేరాయి. నాలుగు అంతస్తుల్లో కిచెన్, పార్కింగ్, విద్యుత్, ఇంటర్నెట్ వంటి మౌలిక సదుపాయాలు ఉన్నాయి. ఒకేసారి మూడు షిఫ్ట్‌ల్లో దాదాపు 2,000 మంది ఉద్యోగులు పనిచేసే స్థలం అందుబాటులో ఉంది.

ప్రభుత్వం టైర్-2 నగరాలకు ఐటీ రంగాన్ని విస్తరించాలని భావించడంతో 2023లో దీనికి శంకుస్థాపన చేసింది. ప్రస్తుతం ఆదిలాబాద్‌లో రెండు ఐటీ కంపెనీలు తాత్కాలిక కార్యాలయాల్లో పనిచేస్తున్నాయి. టవర్ అందుబాటులోకి వస్తే మూడేళ్ల వరకు అద్దె లేనందున ఆ కంపెనీలు తమ కార్యాలయాలను ఇక్కడికి మార్చుకోవాలని ఎదురుచూస్తున్నాయి.

స్థానిక మహిళా ఉద్యోగి ఒకరు మాట్లాడుతూ, “మేం ప్రస్తుతం అద్దె భవనంలో ఉంటున్నాం. ఐటీ టవర్ కేటాయిస్తే ఖర్చు తగ్గించుకోవచ్చు. కుటుంబంతో ఇక్కడే ఉంటూ ఉద్యోగం చేయగలిగితే మహిళా ఉద్యోగులకు చాలా సహాయంగా ఉంటుంది” అని తన అనుభవం పంచుకున్నారు. స్థానిక యువత కూడా ఐటీ టవర్ వల్ల మరిన్ని ఉద్యోగ అవకాశాలు రావాలని ఆశిస్తున్నారు.

సుమారు 68,000 చదరపు అడుగుల విస్తీర్ణం గల ఈ టవర్ ఎప్పుడు ప్రారంభమవుతుందనే దానిపై ఇప్పుడు అధికారిక సమాచారం లేదు. స్థానిక ఐటీ సంస్థలు, నిరుద్యోగ యువత ప్రారంభం కోసం ఎదురుచూస్తున్నారు.