ఆర్మీ, పోలీస్ ఉద్యోగాల కోసం అదిలాబాద్‌లో గిరిజన యువత కఠిన శిక్షణ

అదిలాబాద్ జిల్లాకు చెందిన గిరిజన యువత ఆర్మీ, పోలీసు ఉద్యోగాల సాధనకు కఠినంగా శ్రమిస్తున్నారు. జిల్లాలోని ఒక రక్షణ శిక్షణా కేంద్రంలో 300 మందికిపైగా అభ్యర్థులు ఉచితంగా శిక్షణ పొందుతున్నారు.

గత ఐదేళ్ళ కాలంలో ఈ జిల్లా నుంచి 316 మంది భారత సైన్యంలో రిక్రూట్ అయ్యారని స్థానిక సమాచారం. శిక్షణ పొందుతున్న 300 మందిలో 80 మంది గిరిజన యువత ఉన్నారు. సైన్యంలో పనిచేసి పదవీ విరమణ పొందిన వారు వీరికి శిక్షణ ఇస్తున్నారు.

అగ్నివీర్ పథకం కింద సైన్యంలో చేరేందుకు చాలా మంది రాత పరీక్షలో ఉత్తీర్ణులయ్యారు. అక్టోబర్‌లో జరగనున్న ఫిజికల్ టెస్టుల కోసం వీరు సిద్ధమవుతున్నారు. గత బ్యాచ్‌లో 50 మందికి 48 మంది ఎంపిక కావడం విశేషం.

ఇక్కడ శిక్షణలో ఉదయం నుండి నాలుగు గంటల పాటు వార్మప్, స్ట్రెచింగ్, రన్నింగ్, లాంగ్ జంప్, హైజంప్ వంటివి ఉంటాయి. పోలీసు ఉద్యోగాలకు సిద్ధమవుతున్న అభ్యర్థులు కూడా ఇదే కేంద్రంలో శ్రమిస్తున్నారు. ఇటీవల 7,500 పోలీసు కానిస్టేబుల్ పోస్టుల నోటిఫికేషన్ వెలువడడంతో వారిలో ఉత్సాహం నెలకొంది.

“యూనిఫాం ధరించి, తుపాకీ పట్టుకుని నిలబడాలన్నదే లక్ష్యం” అని ఒక అభ్యర్థి చెప్పారు. మరో మహిళా అభ్యర్థి మాట్లాడుతూ, ముందు నడక రాకపోయినా ఇప్పుడు 3:30 నిమిషాల్లో రన్నింగ్ పూర్తి చేస్తున్నానని తెలిపారు.