నైపుణ్యాలు పెంచుకుంటే AI ఏమీ చేయలేదు: CM రేవంత్ రెడ్డి

తెలంగాణ ముఖ్యమంత్రి రేవంత్ రెడ్డి AI వల్ల ఏర్పడుతున్న ఉద్యోగ సంక్షోభం గురించి హెచ్చరిస్తూ, నైపుణ్యాలు పెంచుకుంటే AI కూడా ఏమీ చేయలేదని స్పష్టం చేశారు. AI వైట్ కలర్ ఉద్యోగాలను తీసుకోగలదు కానీ నైపుణ్యం ఆధారిత బ్లూ కలర్ ఉద్యోగాలను తీయలేదని ఆయన తెలిపారు.

ఈ నేపథ్యంలో ప్రభుత్వం 119 ITI సంస్థలను అడ్వాన్స్డ్ టెక్నాలజీ సెంటర్లు (ATC)గా మార్చిందని, ATC లో చేరే విద్యార్థులకు నెలకు రూ. 2000 స్టైఫండ్ ఇస్తున్నారని CM రేవంత్ రెడ్డి వివరించారు. పాలిటెక్నిక్ కళాశాలలను అప్‌గ్రేడ్ చేసి యంగ్ ఇండియా స్కిల్స్ యూనివర్సిటీ తీసుకొచ్చామని ఆయన చెప్పారు.

భవిష్యత్తులో ఇంగ్లీష్ మాత్రమే సరిపోదని, జర్మన్, జపనీస్, సౌత్ కొరియన్ భాషలు కూడా నేర్చుకోవాలని CM హితవు పలికారు. ఆ దేశాలలో కోట్లాది ఉద్యోగ అవకాశాలు అందుబాటులో ఉన్నాయని ఆయన తెలిపారు.

పెద్ద కంపెనీలకు CEO లుగా పనిచేయడం సరిపోదని, తెలంగాణ నుండి యూనికార్న్ కంపెనీలు రావాలని CM రేవంత్ రెడ్డి పిలుపు ఇచ్చారు. పరిశోధన కోసం Google సంస్థతో ఒప్పందం చేసుకున్నామని ఆయన వెల్లడించారు.

సోషల్ వెల్ఫేర్ పాఠశాలల్లో చదువుకున్న విద్యార్థులు IAS, IPS, IFS అధికారులు అవడం తనకు గర్వంగా ఉందని, ఆ పిల్లలు దేశ పునర్నిర్మాణంలో భాగస్వాములు కావాలని CM కలలు కంటున్నానని వ్యాఖ్యానించారు.