Air India విమానంలో కుదుపులు: పైలట్ డోప్ టెస్ట్ పాజిటివ్ అంటూ వార్తలు

ఆగస్టు 4న Air India విమానం AI-2379 ఫుకెట్ నుంచి ఢిల్లీకి వెళుతుండగా తీవ్ర కుదుపులకు గురైంది. విమానం ఒక్కసారిగా 300 అడుగుల ఎత్తు నుంచి కిందకు పడిపోయింది. ఈ ప్రమాదంలో 17 మంది ప్రయాణికులు, నలుగురు సిబ్బంది గాయపడ్డారు. విమానం ఢిల్లీ ఎయిర్పోర్టులో అత్యవసరంగా ల్యాండ్ అయింది.

ఈ ఘటన జరిగిన ఐదు రోజుల తర్వాత, కొత్త వివాదం బయటపడింది. విమానాన్ని నడిపిన ఇద్దరు పైలట్లలో ఒకరు డోప్ టెస్ట్‌లో విఫలమైనట్లు కొన్ని మీడియా నివేదికలు పేర్కొంటున్నాయి. ఆ పైలట్ శరీరంలో సైకోయాక్టివ్ పదార్థాలు ఉన్నట్లు తెలిపాయి. అయితే, ఈ వార్తలను ఇండియన్ పైలట్స్ ఫెడరేషన్ ఖండించింది. Air India ఈ విషయంపై అధికారికంగా స్పందించలేదు.

కేంద్ర విమానయాన శాఖ మంత్రి రామ్మోహన్ నాయుడు, ఈ ఘటనపై DGCA దర్యాప్తు కొనసాగుతోందని తెలిపారు. DGCA నిబంధనల ప్రకారం, ప్రతిరోజూ విమాన సిబ్బందికి డ్రగ్ టెస్ట్ నిర్వహిస్తారు. టెస్ట్ పాజిటివ్ వస్తే వెంటనే ఫ్లయింగ్ డ్యూటీ నుంచి తొలగించి, డీ-అడిక్షన్ సెంటర్కు పంపిస్తారు. మొదటిసారి అయితే మళ్లీ టెస్ట్ నెగటివ్ వచ్చే వరకు ఫ్లైట్ ఎక్కనివ్వరు. రెండోసారి పాజిటివ్ వస్తే పైలట్ లైసెన్స్ రద్దు చేస్తారు.

కుదుపుల సమయంలో పైలట్ వెంటనే దగ్గరి ఎయిర్‌పోర్టులో దిగకుండా ఢిల్లీ వరకు వెళ్లడంపై విమర్శలు వచ్చాయి. ఒక బోయింగ్ ఎయిర్‌క్రాఫ్ట్ ఇన్స్ట్రక్టర్ మాట్లాడుతూ, ఇది 'చాలా పేలవమైన ఎయిర్‌మెన్‌షిప్' అని అన్నారు. ప్రయాణికుల భద్రత దృష్ట్యా పైలట్లకు మరింత కఠినమైన శిక్షణ ఇవ్వాల్సిన అవసరం ఉందని నిపుణులు సూచిస్తున్నారు.