2026 మహీంద్రా థార్ OG: కొత్త ఫీచర్లు, సేఫ్టీ అప్‌గ్రేడ్లు

మహీంద్రా కొత్త 2026 థార్ OG ఎస్యూవీ వివరాలను విడుదల చేసింది. కొత్త మోడల్ గ్లైడ్ 4G ప్లాట్‌ఫామ్ ఆధారంగా రూపొందింది. దీని వల్ల కారు బరువు తగ్గడంతో పాటు డ్రైవింగ్ అనుభవం మెరుగయ్యింది. బాడీ ఫ్రేమ్ చట్రంపై మహీంద్రా తొలిసారిగా FSD టెక్నాలజీతో కూడిన సస్పెన్షన్ ఇచ్చింది. రియర్ సైడ్‌లో పెంటా-లింక్ సస్పెన్షన్ సెటప్ వచ్చింది. దీంతో కొత్త థార్ మరింత స్టేబుల్‌గా, కంఫర్ట్‌గా ఉంది. బయటి డిజైన్‌లో కొత్త హెడ్‌లైట్లు, గ్రిల్, బంపర్, ఫాగ్ లైట్లు, కార్నరింగ్ ల్యాంప్ ఉన్నాయి. 19 అంగుళాల డ్యూయల్ టోన్ వీల్స్, 255/60 ఆల్-టెర్రైన్ టైర్లు ఇచ్చారు. పాత మోడల్‌లో ముందు వైపు మాత్రమే డిస్క్ బ్రేక్లు ఉండగా, కొత్త వెర్షన్‌లో వెనుక చక్రాలకు కూడా డిస్క్ బ్రేక్లు వచ్చాయి. వెనుక భాగంలో కొత్త టెయిల్ లైట్లు, కెమెరాతో స్పేర్ వీల్ అమర్చారు. ఇంటీరియర్‌లో ట్రఫుల్ బ్రౌన్, బ్లాక్ కలర్ స్కీమ్ ఉంది. సీట్లు మరింత కంఫర్ట్‌గా మారాయి. స్లైడింగ్ ఆర్మ్‌రెస్ట్ కింద చిన్న స్టోరేజ్ బాక్స్ ఉంది. అతి పెద్ద మార్పు కొత్త ఎలక్ట్రిక్ స్టీరింగ్. పాత వెర్షన్లలో హైడ్రాలిక్ స్టీరింగ్ ఉండేది. కొత్త ఎలక్ట్రిక్ యూనిట్ సిటీ డ్రైవింగ్‌లో చాలా సులభంగా ఉంటుంది. కొత్త కలర్ MID స్పీడోమీటర్, టాకోమీటర్ సమాచారం ఇస్తుంది. టచ్‌స్క్రీన్ సిస్టమ్ ద్వారా ఆఫ్-రోడ్ డైనమిక్స్, ట్రాక్ రికార్డులు, కస్టమ్ సెట్టింగ్స్ చూడొచ్చు. సెంటర్ కన్సోల్ పాత లేఅవుట్‌లాగే ఉన్నా, కొత్త స్విచ్ గేర్ వచ్చింది. ఈ స్విచ్‌లతో ఎలక్ట్రికల్ లాకింగ్ డిఫరెన్షియల్ నియంత్రించవచ్చు. థార్‌లో ఈ ఫీచర్ తొలిసారి వచ్చింది. స్నో, మడ్, వాటర్ వంటి డ్రైవ్ మోడ్‌లు కూడా ఉన్నాయి. సేఫ్టీ విషయంలో రోల్ కేజ్ స్టాండర్డ్‌గా ఉండగా, ఇప్పుడు వెనుక ప్రయాణికుల కోసం ప్రత్యేక ఎయిర్‌బ్యాగులు వచ్చాయి. ముందు ప్రయాణికులకు అదనంగా రెండు ఎయిర్‌బ్యాగులు ఉన్నాయి. ఇంజిన్ ఆప్షన్లు పాతవే: 1.5 లీటర్ డీజిల్, 2.2 లీటర్ డీజిల్, 2.0 లీటర్ టర్బో పెట్రోల్. అయితే అన్ని ఇంజిన్ల పవర్ అవుట్‌పుట్ పెరిగింది. కొత్త థార్‌లో 15కి పైగా ప్రధాన మార్పులు ఉన్నప్పటికీ అన్ని ఫీచర్లు స్టాండర్డ్ వేరియంట్లలో రావు. చాలా ఫీచర్లు టాప్ ఎండ్ వేరియంట్‌లో మాత్రమే అందుతాయి.