అమర్నాథ్ మంచు లింగం 5 రోజుల్లోనే 90% కరిగింది; పెరిగిన భక్తుల రద్దీ, వాతావరణ మార్పులే కారణమా?

ఈ సంవత్సరం అమర్నాథ్ యాత్ర ప్రారంభమైన ఐదు రోజుల్లోనే సహజసిద్ధంగా ఏర్పడే మంచు లింగం 90 శాతానికి పైగా కరిగిపోయింది. యాత్ర మొదలైన మొదటి నాలుగు రోజుల్లోనే 93,000 మంది భక్తులు స్వామిని దర్శించుకున్నారు.

జమ్మూ కాశ్మీర్ పీపుల్స్ డెమోక్రటిక్ పార్టీ నాయకురాలు ఇల్తిజా ముఫ్తీ మంచు లింగం వేగంగా కరగడంపై ఆందోళన వ్యక్తం చేశారు. పర్యావరణ పరిరక్షణ కోసం తక్షణ చర్యలు చేపట్టాలని డిమాండ్ చేశారు. జమ్మూ కాశ్మీర్ లెఫ్టినెంట్ గవర్నర్ మనోజ్ సిన్హా మాట్లాడుతూ, రిజిస్ట్రేషన్ లేకుండా వస్తున్న భక్తుల వల్ల ఇబ్బందులు ఎదురవుతున్నాయని తెలిపారు.

గతంలో 2004, 2006, 2020 సంవత్సరాల్లో కూడా ఇలాగే మంచులింగం ముందుగానే కరిగిపోయింది. 2018లో 29 రోజులు, 2022లో 28 రోజుల్లో లింగం కరిగిపోయింది. హిమాలయాల్లో ఉష్ణోగ్రతలు వేగంగా పెరగడంతో పాటు మంచు కురిసే విధానంలో మార్పు వస్తోందని శాస్త్రవేత్తలు హెచ్చరిస్తున్నారు.

అమర్నాథ్ గుహ సమీపంలో గత రెండు దశాబ్దాలుగా రహదారుల విస్తరణ, తాత్కాలిక వసతులు, విద్యుత్ సరఫరా పెరగడం వల్ల గుహ మైక్రో క్లైమేట్ మారుతోందని నిపుణులు అంటున్నారు. కొత్తగా ప్రతిపాదించిన రోప్‌వే ప్రాజెక్టుపై పర్యావరణ ప్రేమికులు తీవ్ర నిరసన తెలుపుతున్నారు. గుహ దగ్గర నిర్మించిన వర్షపు షెల్టర్ల ప్రభావంపై స్వతంత్ర శాస్త్రీయ అధ్యయనం జరపాలని కాంగ్రెస్ పార్టీ డిమాండ్ చేసింది.

భక్తుల సౌకర్యాలు, మౌలిక వసతుల కల్పనతో పాటు హిమాలయ పర్యావరణాన్ని కాపాడుకోవాల్సిన అవసరం ఉందని పలువురు నొక్కి చెబుతున్నారు. సుప్రీంకోర్టు రోజుకు 10 వేల మందికి మాత్రమే అనుమతి ఇవ్వాలన్న ఆదేశాలు ఉన్నప్పటికీ, అధికారులు రికార్డు స్థాయి భక్తుల రాకను విజయంగా చెప్పుకుంటున్నారు.