అమూల్, మదర్ డైరీ పాల ధరలు పెరిగాయి: లీటర్‌కు ₹2 నుంచి ₹4 వరకు పెరుగుదల

అమూల్, మదర్ డైరీ సంస్థలు పాల ధరలను పెంచాయి. ఈ రోజు నుంచే కొత్త ధరలు అమలులోకి వచ్చాయి. పాల రకాన్ని బట్టి లీటర్‌కు ₹2 నుంచి ₹4 వరకు ధర పెరిగింది.

గుజరాత్ కోఆపరేటివ్ మిల్క్ మార్కెటింగ్ ఫెడరేషన్ (GCMMF) అమూల్ బ్రాండ్ ఉత్పత్తుల ధరలను సవరించింది. అమూల్ తాజా టోన్డ్ పాలు లీటర్‌కు ₹2 పెరిగి ₹62కి చేరాయి. అమూల్ గోల్డ్ ఫుల్ క్రీమ్ పాలు లీటర్‌కు ₹4 పెరిగి ₹80కి చేరుకున్నాయి. తాజా, శక్తి, టీ స్పెషల్ వంటి ప్రధాన వేరియంట్ల రేట్లు కూడా పెంచారు.

ఢిల్లీ, NCR ప్రాంతంలో మదర్ డైరీ కూడా ధరలు పెంచింది. ఫుల్ క్రీమ్ పాలు లీటర్ ₹76కి, టోన్డ్ పాలు ప్యాకెట్ ₹62కి, డబుల్ టోన్డ్ పాలు ₹56కి చేరాయి. ఆవు పాలు లీటర్ ₹65కి, బల్క్ టోన్డ్ పాలు ₹60కి పెరిగాయి.

రైతుల నుంచి పాల సేకరణ ధరలు పెరగడంతో వినియోగదారులపై కొంత భారం పడుతోందని కంపెనీలు తెలిపాయి. పశువుల దాణా, పాల ప్రాసెసింగ్, ప్యాకేజింగ్, ఇంధన, రవాణా ఖర్చులు పెరగడం ధరల పెరుగుదలకు కారణమని పేర్కొన్నాయి. గత ఏడాది కాలంలో రైతులకు చెల్లించే సేకరణ ధరలను 4 నుంచి 5 శాతం పెంచినట్టు కూడా వెల్లడించాయి.