1.90 లక్షల ఎకరాల చుక్కల భూముల సమస్య త్వరలో పరిష్కరం: మంత్రి సత్యప్రసాద్

రాష్ట్ర రెవెన్యూ మంత్రి అనగాని సత్యప్రసాద్ సచివాలయంలో విలేకరులతో మాట్లాడారు. రాష్ట్రంలో 1.90 లక్షల ఎకరాల చుక్కల భూముల సమస్యను త్వరలో పరిష్కరిస్తామని ప్రకటించారు. ఇందులో 15 రోజుల్లో 90 వేల ఎకరాల చుక్కల భూములను పూర్తిగా విడుదల చేస్తామని వివరించారు.

గత ప్రభుత్వం భూ యాజమాన్య హక్కులపై ప్రజల్లో అనిశ్చితి సృష్టించిందని మంత్రి ఆరోపించారు. ప్రస్తుత ప్రభుత్వం ఈ సందేహాలు తొలగించి భూమిపై విశ్వాసం పునరుద్ధరిస్తోందని చెప్పారు. అయితే రాష్ట్రంలో భూముల మార్కెట్ ధరల పెంపు ప్రతిపాదన ప్రస్తుతం పరిశీలనలో లేదని స్పష్టం చేశారు.

ఫ్రీ హోల్డ్ భూముల సమస్యను ప్రత్యేక సాఫ్ట్వేర్ ద్వారా పరిష్కరించనున్నట్లు తెలిపారు. గ్రామకంఠంలో ఇళ్ల స్థలాల రిజిస్ట్రేషన్‌కు అవకాశం కల్పించామని, దీంతో ఇంతకాలం రిజిస్ట్రేషన్ లేని వారికి సొంత ఇల్లు రిజిస్టర్ చేసుకునే వీలు ఏర్పడిందని మంత్రి వివరించారు.

10 ఏళ్లు పూర్తయిన ఇళ్ల పట్టాలను ఆటోమేటిక్‌గా రెన్యూవల్ చేసే విధానం రూపొందిస్తున్నామని, ఇందుకు చట్ట సవరణ అవసరమని చెప్పారు. ఎన్ఓసి లేకుండా నేరుగా రిజిస్ట్రేషన్ చేసే సౌలభ్యం కూడా కల్పిస్తామని అనగాని సత్యప్రసాద్ వెల్లడించారు.