హైదరాబాద్‌లో భారీ వర్షాలు : ఉస్మాన్ సాగర్, హిమాయత్ సాగర్ లో నీటిమట్టాలు పెరిగాయి

హైదరాబాద్‌లో కురుస్తున్న భారీ వర్షాల కారణంగా ఉస్మాన్ సాగర్ మరియు హిమాయత్‌సాగర్ జంట జలాశయాల్లోకి భారీగా వరద నీరు చేరుతోంది. జలమండలి అధికారులు అప్రమత్తమై పరిస్థితిని నిశితంగా గమనిస్తున్నారు.

హిమాయత్ సాగర్ జలాశయం పూర్తి స్థాయి నీటిమట్టం 1763.5 అడుగులు కాగా, ప్రస్తుతం 1761.55 అడుగులకు చేరింది. నిల్వ సామర్థ్యం 2.521 టీఎంసీలు ఉండగా, ఇప్పుడు 2.240 టీఎంసీల నీరు నిల్వ ఉంది. వెంకటాపూర్, అమలాపూర్, పాలమాకుల వాగుల నుంచి భారీ ఇన్‌ఫ్లో వస్తోంది.

ఉస్మాన్ సాగర్ జలాశయానికి కూడా వరద పోటెత్తింది. ఇన్‌ఫ్లో 480 క్యూసెక్కులుగా నమోదైంది. పూర్తి స్థాయి నీటిమట్టం 1790 అడుగులు కాగా, ప్రస్తుతం 1784 అడుగుల వద్ద ఉంది. నిల్వ సామర్థ్యం 3.518 టీఎంసీలు, ప్రస్తుతం 2.326 టీఎంసీల నీరు ఉంది.

వాతావరణ శాఖ హెచ్చరిక ప్రకారం, ఈ సాయంత్రం 5 గంటల నుంచి అర్ధరాత్రి వరకు కొన్ని ప్రాంతాల్లో భారీ వర్షాలు కురిసే అవకాశం ఉంది. అనంతగిరి హిల్స్, నాదర్‌గూడా, వెంకటాపూర్ పరిసరాల్లో మరింత వర్షం కురిస్తే, జలాశయాలు పూర్తిగా నిండి గేట్లు ఎత్తే పరిస్థితి ఏర్పడవచ్చని అధికారులు చెబుతున్నారు.

హిమాయత్ సాగర్ వద్ద రాజేంద్రనగర్ పోలీసులు ఆంక్షలు విధించారు. రీల్స్ చేసేందుకు, చేపలు పట్టేందుకు ఎవరినీ అనుమతించడం లేదు. ఒకవేళ గేట్లు ఎత్తి నీటిని విడుదల చేస్తే, లంగర్ హౌస్, చాదర్‌ఘాట్, ఉప్పల్, నాగోల్ మీదుగా నల్గొండ వరకు ప్రవాహం వెళ్లవచ్చు. ఒకటి లేదా రెండు గేట్లు మాత్రమే తెరిస్తే పెద్దగా ఇబ్బంది ఉండదని, కానీ ఎక్కువ గేట్లు ఎత్తితే దిగువ ప్రాంతాల్లో ప్రమాదం ఉంటుందని చెబుతున్నారు. జలాశయాల వద్ద అధికారులు, రెస్పాన్స్ టీములు ఎప్పటికప్పుడు పరిస్థితిని సమీక్షిస్తూ అప్రమత్తంగా ఉన్నారు.