ఏరోస్పేస్, రక్షణ రంగాల్లో ఏపీ ప్రభుత్వం ఆరు క్లస్టర్లు – 24 కంపెనీలకు రూ.27,610 కోట్ల పెట్టుబడులకు అనుమతులు

ఏరోస్పేస్, రక్షణ రంగాల అభివృద్ధి కోసం ఆంధ్రప్రదేశ్ ప్రభుత్వం రాష్ట్రవ్యాప్తంగా ఆరు ప్రత్యేక పారిశ్రామిక క్లస్టర్లను ఏర్పాటు చేస్తోంది. ఈ క్లస్టర్లలో పెట్టుబడులు పెట్టేందుకు ఇప్పటికే 24 కంపెనీలకు ప్రభుత్వం అనుమతులు ఇచ్చింది. ఈ పెట్టుబడుల విలువ సుమారు రూ.27,610 కోట్లు.

విశాఖ, శ్రీకాకుళం, అనకాపల్లి, కాకినాడ జిల్లాల్లో 3,000 ఎకరాల్లో నౌకాయాన రంగ పరిశ్రమల క్లస్టర్ ఏర్పాటవుతోంది. ఎన్టీఆర్ జిల్లా జగ్గయ్యపేటలో 3,000 ఎకరాల్లో క్షిపణులు, మందుగుండు తయారీ క్లస్టర్ ఏర్పాటవుతోంది. కర్నూలు జిల్లాలో 600 ఎకరాల్లో డ్రోన్ల తయారీ క్లస్టర్, శ్రీ సత్యసాయి జిల్లాలో ఏరోస్పేస్ ఎలక్ట్రానిక్స్ క్లస్టర్, తిరుపతి జిల్లా రౌతు సురమాలలో 2,500 ఎకరాల స్పేస్ సిటీ, ప్రకాశం జిల్లా దొరకొండలో ఎయిర్‌క్రాఫ్ట్ విడిభాగాల తయారీ క్లస్టర్ ఏర్పాటవుతున్నాయి.

అనకాపల్లిలో భారత్ డైనమిక్స్ లిమిటెడ్ (BDL) రూ.489 కోట్లు, సాగర్ డిఫెన్స్ రూ.45 కోట్లు పెట్టుబడి పెడుతున్నాయి. కృష్ణా జిల్లాలో ఐకామ డిఫెన్స్ ఎక్స్ప్లోసివ్స్ రూ.840 కోట్లతో ప్లాంట్ ఏర్పాటుకు అనుమతులు పొందింది. కర్నూలు జిల్లాలో ఆల్గోబోటిక్స్, డ్రోగో, లాట్రిక్స్, సెన్స్ ఇమేజ్, జేడీకే ఫ్లై సంస్థలు రూ.407 కోట్లు పెట్టుబడి పెడుతున్నాయి. సత్యసాయి జిల్లాలో డీఆర్డీవో నేతృత్వంలో అడ్వాన్స్డ్ మీడియం కంబాట్ ఎయిర్‌క్రాఫ్ట్ ప్రాజెక్టు, కళ్యాణి స్ట్రాటజీ సిస్టమ్స్, హెచ్ఎఫ్సిఎల్, భారత్ ఎలక్ట్రానిక్స్, ఆస్ట్రో బేస్ స్పేస్ వంటి సంస్థలు మొత్తం రూ.21,210 కోట్ల పెట్టుబడులు పెట్టేందుకు అనుమతులు మంజూరయ్యాయి.

ఈ అన్ని కంపెనీల ఏర్పాటు వల్ల సుమారు 21,349 మందికి ఉపాధి లభిస్తుందని అంచనా. 2025-26లో ఈ అనుమతులు ఇవ్వగా, చాలా కంపెనీలు ఇప్పటికే నిర్మాణ పనులు ప్రారంభించాయి. రాబోయే రెండు మూడేళ్లలో ఉత్పత్తి మొదలవుతుందని ప్రభుత్వం ఆశిస్తోంది. ఏరోస్పేస్ డిఫెన్స్ పాలసీ 4.0 ద్వారా రాష్ట్రంలో లక్ష కోట్ల రూపాయల పెట్టుబడులను ఆకర్షించాలని ప్రభుత్వం లక్ష్యంగా పెట్టుకుంది.