ఏపీ పట్టణాభివృద్ధికి కేంద్రానికి ₹5,940 కోట్ల ప్రతిపాదనలు

ఆంధ్రప్రదేశ్ ప్రభుత్వం పట్టణ మౌలిక వసతుల అభివృద్ధికి ₹5,940 కోట్ల ప్రాజెక్టులను కేంద్ర పట్టణాభివృద్ధి మంత్రిత్వ శాఖకు ప్రతిపాదించింది. అర్బన్ ఛాలెంజ్ ఫండ్ రెండో విడతలో భాగంగా ఈ ప్రతిపాదనలు చేసింది. నాలుగు ప్రధాన నగరాలు, 59 పురపాలక సంఘాల్లో తాగునీరు, డ్రైనేజీ, మురుగునీటి వ్యవస్థలు, పార్కింగ్ వంటి వసతులను మెరుగుపరచడం లక్ష్యం.

ఈ ప్రతిపాదనలపై ఢిల్లీలో ఇప్పటికే ఉన్నత స్థాయి సమావేశంలో చర్చ జరిగింది. DPR సిద్ధం చేసిన తర్వాత మరోసారి కేంద్రంతో సమావేశం నిర్వహించనున్నారు. ఈ పథకం కింద ప్రాజెక్టు అంచనా వ్యయంలో 25% నిధులను కేంద్రం గ్రాంట్ గా అందించనుంది. మిగిలిన మొత్తాన్ని రాష్ట్ర ప్రభుత్వం, పురపాలక సంస్థలు సమకూర్చాల్సి ఉంటుంది.

విజయవాడలో కీలక ప్రాంతాల్లో డ్రైనేజీ వ్యవస్థకు ₹600 కోట్లు, తాగునీటి సరఫరాలో SCADA విధానానికి ₹300 కోట్లు ప్రతిపాదించారు. నెల్లూరులో మురుగునీటిని శుద్ధి చేసి పరిశ్రమలకు వినియోగించేందుకు ₹120 కోట్ల ప్రాజెక్టు ఉంది. అక్కడే రెండు దశల్లో ₹130 కోట్ల మురుగునీటి కాలవల పనులు చేపట్టాలని నిర్ణయించారు.

రాజమహేంద్రవరంలో ₹20 కోట్లతో PPP విధానంలో మల్టీ లెవెల్ కార్ పార్కింగ్, ₹120 కోట్లతో గోదావరి రివర్ ఫ్రంట్ అభివృద్ధి, ₹100 కోట్లతో కమర్షియల్ హబ్ ప్రతిపాదించారు. గుంటూరులో ₹300 కోట్లతో భూగర్భ మురుగునీటి వ్యవస్థ, PVK నాయుడు కూరగాయల మార్కెట్ అభివృద్ధికి ₹100 కోట్లు, తాగునీటి SCADA వ్యవస్థకు మరో ₹100 కోట్లు ప్రతిపాదించారు.

ఈ ప్రాజెక్టులకు రాష్ట్ర వాటా నిధులు సమకూర్చడం ముఖ్యంగా మారింది. ఇందుకోసం HUDCO నుంచి రుణం తీసుకునే ప్రతిపాదనలను ప్రభుత్వం సిద్ధం చేసింది. నగరపాలక సంస్థల పరిధిలో మున్సిపల్ బాండ్ల ద్వారా నిధులు సమీకరించే అవకాశాన్ని కూడా పరిశీలిస్తోంది.