రాష్ట్రవ్యాప్తంగా పల్స్ పోలియో కార్యక్రమం: 49.2 లక్షల చిన్నారులకు చుక్కలు

ఆంధ్రప్రదేశ్‌లో ఈ రోజు రాష్ట్రవ్యాప్త పల్స్ పోలియో కార్యక్రమం నిర్వహిస్తున్నారు. ఐదేళ్ల లోపు 49.2 లక్షల మంది చిన్నారులకు పోలియో చుక్కలు వేయడం లక్ష్యం.

ఈ కార్యక్రమాన్ని ముఖ్యమంత్రి చంద్రబాబు నాయుడు ఉండవల్లి క్యాంపు కార్యాలయంలో ప్రారంభించారు. విశాఖపట్నంలో వైద్య ఆరోగ్య శాఖ మంత్రి సత్యకుమార్ యాదవ్ ప్రారంభోత్సవం చేశారు.

వైద్య ఆరోగ్య కుటుంబ సంక్షేమ శాఖ కమిషనర్ చక్రధర్ బాబు మాట్లాడుతూ, ఈ కార్యక్రమానికి అన్ని ఏర్పాట్లు పూర్తయ్యాయన్నారు. కేంద్ర ప్రభుత్వం అందించిన డోసులు ఇప్పటికే అన్ని జిల్లాలకు పంపించామన్నారు.

ప్రత్యేక బూత్‌లలో ANM, ఆశా వర్కర్, అంగన్‌వాడీ వర్కర్, స్టాఫ్ నర్సుల బృందాలు పిల్లలకు చుక్కలు వేస్తున్నాయి. ఈ రోజు చుక్కలు వేయించుకోలేని పిల్లలకు మరుసటి రెండు రోజుల్లో వారి ఇళ్లకే వెళ్లి ప్రత్యేక వైద్య బృందాలు చుక్కలు వేస్తాయి.

ఈ కార్యక్రమంలో మెడికల్ అధికారులు, ఫార్మసిస్టులు, నర్సింగ్ విద్యార్థులు, స్వచ్ఛంద సంస్థల ప్రతినిధులు పాల్గొంటున్నారు. జిల్లాల్లో మంత్రులు, ప్రజా ప్రతినిధులు కూడా భాగస్వామ్యం అవుతున్నారు.