కడప జిల్లాలో భారతీ సిమెంట్స్‌లో శాశ్వత ఉద్యోగాల డిమాండ్‌తో కార్మికుల నిరసన

కడప జిల్లా కమలాపురం మండలం నల్లలింగాయపల్లిలోని భారతీ సిమెంట్స్ కర్మాగారం వద్ద 28 మంది కార్మికులు గత వారం రోజులుగా శాంతియుత ధర్నా నిర్వహిస్తున్నారు. వీరు శాశ్వత ఉద్యోగ భద్రత కోరుతున్నారు.

ఈ పరిశ్రమకు స్థానిక రైతులు సాగు భూములు ఇచ్చారు. భూములు ఇచ్చిన వారికి పర్మనెంట్ ఉద్యోగాలు ఇస్తామని యాజమాన్యం గతంలో హామీ ఇచ్చింది. కానీ భూములు తీసుకున్నాక ఒప్పంద ఉద్యోగాలు మాత్రమే కల్పించడంతో కార్మికులు అసంతృప్తి చెందారు.

ఆరు నెలల క్రితం 10 మంది కార్మికులు కంపెనీ సీఈఓను కలిసి పర్మనెంట్ ఉద్యోగాలు కోరారు. దాంతో ఆగ్రహించిన యాజమాన్యం వారిని విధుల నుండి తొలగించింది. నిలదీసిన మరో 18 మందిని కూడా తప్పించారు. మొత్తం 28 మంది ఉద్యోగాలు కోల్పోయారు.

కార్మికులు తాము కంపెనీ వాహనాలను అడ్డుకోలేదని, కేవలం ఉద్యోగాలు కల్పించాలని డిమాండ్ చేస్తూ శాంతియుతంగా నిరసన తెలుపుతున్నామని చెప్పారు. తమను రౌడీలుగా ప్రచారం చేస్తున్నారని, యాజమాన్యం కక్ష సాధింపు ధోరణితో వ్యవహరిస్తుందని ఆరోపించారు.

ఈ వ్యవహారంపై భారతీ సిమెంట్స్ యాజమాన్యం హైకోర్టును ఆశ్రయించింది. కొంతమంది వ్యక్తులు కంపెనీ కార్యకలాపాలకు ఆటంకం కలిగిస్తున్నారని, వారిపై చర్యలు తీసుకోవాలని పిటిషన్ వేసింది. దీనిపై వాదనలు పూర్తయ్యాయి. ఈ విషయంలో కార్మికుల డిమాండ్లు నెరవేరాలని, తమకు అన్యాయం జరగకూడదని వారు కోరుతున్నారు. కంపెనీ యాజమాన్యం ఇంతవరకు ఎలాంటి చర్య తీసుకోలేదు. ఈ వ్యాజ్యంపై హైకోర్టు తీర్పు కోసం ఎదురు చూస్తున్నారు.