ఏపీలో ఉరుములు, మెరుపులతో కూడిన భారీ వర్షాలు; 11 జిల్లాలకు హెచ్చరిక

మధ్య బంగాళాఖాతంలో ఏర్పడిన ద్రోణి కారణంగా ఆంధ్రప్రదేశ్‌లో పలు జిల్లాల్లో ఉరుములు, మెరుపులతో కూడిన వర్షాలు కురుస్తాయని రాష్ట్ర విపత్తు నిర్వహణ సంస్థ (APSDMA) హెచ్చరించింది. ఈ ద్రోణి మధ్య బంగాళాఖాతం నుంచి కర్ణాటక తీరం, ఆంధ్రప్రదేశ్ మీదుగా తెలంగాణ వరకు విస్తరించింది. దీని ప్రభావంతో కోస్తా, రాయలసీమ జిల్లాల్లో వాతావరణం మారిపోతుందని అధికారులు తెలిపారు.

అల్లూరి సీతారామరాజు, పశ్చిమ గోదావరి, ఏలూరు, కృష్ణా, NTR, గుంటూరు, బాపట్ల, పల్నాడు, ప్రకాశం, నెల్లూరు తదితర జిల్లాల్లో అక్కడక్కడ ఉరుములతో తేలికపాటి నుంచి మోస్తరు వర్షాలు పడే అవకాశం ఉంది. విపత్తు నిర్వహణ సంస్థ MD ప్రకార్ జైన్ సూచనలు జారీ చేస్తూ, ఈ జిల్లాల ప్రజలు బయటకు వెళ్లేటప్పుడు వాతావరణాన్ని గమనించాలన్నారు.

బుధవారం సాయంత్రం విశాఖపట్నం జిల్లా పెందుర్తి మండలంలో బలమైన ఈదురుగాలులు వీచాయి. దీంతో పలుచోట్ల భారీ చెట్లు కూలిపోగా, విద్యుత్ స్తంభాలు విరిగిపడ్డాయి. వైర్లు తెగిపోయి చాలా ప్రాంతాల్లో గంటల కొద్దీ విద్యుత్ సరఫరా నిలిచిపోయింది. విద్యుత్ శాఖ అధికారులు మరమ్మత్తు పనులు చేపట్టారు. అదే రోజు శ్రీకాకుళం జిల్లా గరికపాలెంలో 72.5 మిల్లీమీటర్లు, లావేరులో 64.5 మిల్లీమీటర్లు వర్షపాతం నమోదైంది. అనకాపల్లి జిల్లా మకవరపాలెం, తూర్పు గోదావరి జిల్లా కొవ్వూరులో 44.3 డిగ్రీల ఉష్ణోగ్రత రికార్డయింది.

APSDMA ప్రజలకు పలు సూచనలు చేసింది. పిడుగుల ప్రమాదం ఉన్నందున చెట్ల కింద నిలబడొద్దని, పొలాల్లో పనిచేసే రైతులు, పశువుల కాపరులు సురక్షిత ప్రాంతాల్లో ఆశ్రయం పొందాలని సూచించింది. బలమైన గాలులు వీచే సమయంలో పాత భవనాలు, హోర్డింగ్ల కింద ఉండడం ప్రమాదకరమని కూడా హెచ్చరించింది.