ఏపీలో పొగాకు వేలం అమ్మకాలు నెమ్మది, రైతులు ఆందోళన

ఆంధ్రప్రదేశ్‌లో పొగాకు వేలం ప్రారంభమై మూడు నెలలు గడిచినా అమ్మకాలు నెమ్మదిగా సాగుతున్నాయి. సాధారణంగా ఈ సమయానికి 40 నుంచి 50 శాతం అమ్మకాలు పూర్తి కావాల్సి ఉండగా, 20 శాతం కూడా పూర్తి కాలేదని పొగాకు రైతులు చెబుతున్నారు.

తక్కువ గ్రేడ్ పొగాకుపై వ్యాపారులు ఆసక్తి చూపకపోవడంతో అనేక బేళ్లు నోబిడ్ అయి వెనక్కి వెళ్తున్నాయి. దీంతో వేలం కేంద్రాల నుంచి రైతులు అదనపు ఖర్చు పెట్టి తిరిగి ఇళ్లకు తీసుకెళ్లాల్సి వస్తోంది. బ్రైట్ గ్రేడ్ పొగాకు ధరలు స్థిరంగా ఉన్నా, తక్కువ గ్రేడ్ ధరలు కిలో రూ. 160 వరకు పడిపోయాయని రైతులు తెలిపారు. వ్యాపారులు ధరల విషయంలో సిండికేట్‌గా వ్యవహరిస్తూ, పోటీ లేకుండా చేస్తున్నారని ఆరోపణలు వినిపిస్తున్నాయి.

ఒంగోలులోని పొగాకు వేలం కేంద్రాన్ని రాష్ట్ర మంత్రి డోలా బాలవీరాంజనేయ స్వామి పరిశీలించారు. రైతులకు గిట్టుబాటు ధరలు కల్పించడమే లక్ష్యమని ఆయన తెలిపారు. నోబిడ్ సమస్య లేకుండా చూడాలని అధికారులను ఆదేశించినట్లు చెప్పారు. పొగాకు బోర్డు కూడా సెలక్షన్ ఆఫరింగ్ ద్వారా నోబెట్లను తగ్గించడంలో చురుగ్గా పాల్గొనాలని ఆయన సూచించారు.

ఈ విషయాన్ని ముఖ్యమంత్రి దృష్టికి తీసుకెళ్తామని, అవసరమైతే సీఈవోతో మాట్లాడి పొగాకు కొనుగోలు చేయించేలా చర్యలు తీసుకుంటామని మంత్రి హామీ ఇచ్చారు. ప్రభుత్వం త్వరగా స్పందించి సమస్యలను పరిష్కరించాలని రైతులు కోరుతున్నారు.